“ASAN xidmət” mərkəzi şüar müsabiqəsi elan edib

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi “ASAN xidmət” mərkəzi şüar müsabiqəsi elan edir. Qurumdan Lent.az-a verilən məlumata görə, dövlət orqanlarında hüquqi xidmətlərin göstərilməsində vətəndaş məmnunluğunun, şəffaflığın təmin edilməsi, dövlət qulluqçusu-vətəndaş münasibətlərində yeni düşüncə tərzinin - dövlət qulluqçusunun vəzifəsi vətəndaşın hüququnu təmin etməkdir” yanaşmasının formalaşdırılması istiqamətində fəaliyyət göstərən “ASAN xidmət” ölkəmizdə ilk dəfə olaraq şüar seçimini Azərbaycan vətəndaşlarına həvalə edir.

Fevral ayının 15-nə kimi davam edəcək müsabiqədə vətəndaşlar öz təkliflərini “ASAN xidmət” mərkəzinin “facebook” səhifəsinə məktub yaxud şərh (http://www.facebook.com/www.asan.gov.az), həmçinin [email protected] rəsmi ünvanına yazmaqla bildirə bilər.

Şüar Azərbaycan dilində olmalıdır və üç sözdən artıq olmamalıdır.

Ən maraqlı, kreativ və ASAN xidmətin fəaliyyətinə uyğun şüarla çıxış edən müsabiqə qalibi mükafatlandırılacaq.