Yayda avtomobildə su saxlamaq olmaz

Yayda avtomobildə plastik butulka ilə su saxlamaq təhlükəlidirmi?

Yay aylarında insanlar susuz qalmamaq üçün avtomobillərinə su butulkası qoyurlar. Lakin bu, sağlamlıq üçün gözlənilməz təhlükəyə çevrilə bilər. Məsələ ondadır ki, isti havada plastik butulkalardan suya zərərli maddələr, o cümlədən bisfenol A, ftalatlar və mikroplastiklər keçə bilər.

Bu barədə Lent.az xarici mediaya istinadən xəbər verir.

Plastik butulkalardakı təhlükə nədən ibarətdir?

Endokrinoloq və dietoloq Viktoriya Qonçarenkonun sözlərinə görə, avtomobilin içində temperatur yüksəldikcə, plastik qabların tərkibindəki zərərli maddələr suya keçməyə başlayır. Bu maddələrin bədənə daxil olması aşağıdakı riskləri artırır:

Hormon sistemində pozuntular;

Bəzi xərçəng növlərinə yoluxma ehtimalının artması;

Qaraciyər, beyin və reproduktiv sistem üçün zərər;

2-ci tip diabetin inkişafı;

İnsulinə qarşı həssaslığın azalması (hətta aşağı dozada bisfenol A ilə).

Bundan əlavə, bir dəfə istifadə üçün nəzərdə tutulan plastik butulkalar ekologiyanı ciddi şəkildə çirkləndirir. Statistikaya görə, plastik qabların cəmi 10%-dən azı təkrar emal olunur. Qalan hissə təbiətdə, su hövzələrində və torpaqda toplanaraq, zəhərli maddə kimi yenidən su, hava və qida vasitəsilə insan orqanizminə qayıdır.

Su hansı qabda saxlanılmalıdır?

Mütəxəssislər bildirirlər ki, suyu avtomobildə saxlamaq istəyirsinizsə, şüşə (qalay və ya cam) qab seçmək daha məqsədəuyğundur. Çünki bu qablar yüksək temperaturlara qarşı dayanıqlıdır və zərərli maddə buraxmır.

Eyni zamanda, çox istifadə olunan plastik butulkalar üzərində aşağıdakı işarələr varsa, onların daha təhlükəsiz olduğu ehtimal edilir:

BPA-free – bisfenol A maddəsi yoxdur;

Food grade – qida məhsulları üçün nəzərdə tutulmuş təhlükəsiz plastik.

Ancaq diqqət edilməlidir ki, ən keyfiyyətli plastik qablar belə isti mühitdə su üçün təhlükəyə çevrilə bilər.

Butulka alarkən nələrə diqqət etməli?

Günəşdə saxlanılmayan, kölgədə və ya soyuducuda saxlanmış su qabları seçin.

Qabın möhürlü, təmiz və şəffaf olmasına diqqət yetirin.

Qabda bulanıqlıq, qəribə qoxu və ya çöküntü varsa – bu su içilməməlidir.

Alternativ yol: qaynatma və süzmə

Araşdırmalar göstərir ki, qaynadılmış və ya filtrdən keçmiş su, butulkada olan sudan 90%-ə qədər az mikroplastik ehtiva edir. Bu səbəbdən evdə və ya səfər zamanı suyunuzu süzmək və ya qaynatmaq daha sağlam seçim ola bilər.