Dəbdən düşməyən 5 geyim- İllərlə geyinə biləcəyiniz seçimlər

Moda hər mövsüm dəyişsə də, bəzi geyimlər var ki, illər keçsə də aktuallığını itirmir. Məhz bu parçalar qarderobun əsasını təşkil edir və həm klassik, həm də müasir üslubla asanlıqla uyğunlaşır.

Lent.az xarici mediaya istinadən xəbər verir ki, stilistlərin sözlərinə görə, köhnə geyimlərdən qurtulmağa tələsməyə dəyməz. Sadə kəsimi, keyfiyyətli parçaları və neytral rəngləri ilə seçilən bəzi modellər onilliklər boyu dəbdə qalır.

Klassik trençkot

Trençkot yüz ildən çoxdur ki, dəbdən düşmür. Onu cins şalvar, klassik şalvar, ətək və ya donla rahatlıqla kombinasiya etmək mümkündür.

Ən praktik seçimlər bej, qum rəngi, boz və qara tonlardır. Bu rənglər müxtəlif üslublarla uyğunlaşır və dəb tendensiyalarından asılı olmur.

Ağ köynək

Sadə ağ köynək zərifliyin simvolu hesab olunur. O, həm ofis, həm xüsusi tədbirlər, həm də gündəlik geyim üçün ideal seçimdir. Ağ köynəyi cins və ya şalvarın içərisinə salmaq, sərbəst geyinmək, jilet, pencək və ya sviterlə tamamlayaraq müxtəlif obrazlar yaratmaq mümkündür. Təbii parçadan hazırlanmış, klassik kəsimli model uzun illər aktuallığını qoruyur.

Tünd göy düz kəsim cins şalvar

Dəb dəyişsə də, düz kəsimli tünd göy cins şalvar populyarlığını itirmir. Bu model hər yaşa uyğundur, həm idman, həm də klassik geyimlə rahat uyğunlaşır və əlavə səy göstərmədən səliqəli görünüş yaradır.

Dəri ayaqqabılar və loaferlər

Keyfiyyətli dəri ayaqqabı uzunmüddətli istifadə üçün ən uğurlu seçimlərdən biridir. Düzgün qulluq edildikdə uzun illər istifadə oluna bilər. Qara, tünd qəhvəyi və bej rəngli loaferlər, oksford ayaqqabıları və klassik çəkmələr demək olar ki, bütün qarderobla uyğunlaşır və heç vaxt dəbdən düşmür.

Düz kəsimli pencək

Keyfiyyətli tikilmiş pencək və ya jaket istənilən görünüşə daha zərif və bahalı görüntü bəxş edir. Bu gün onu yalnız klassik şalvarla deyil, cins şalvar, futbolka, don və hətta şortlarla da kombinasiya edirlər. Buna görə stilistlər illər əvvəl alınmış keyfiyyətli pencəkləri qarderobdan çıxarmağa tələsməməyi tövsiyə edirlər.