Məşhur narkokartelin rəhbəri tutuldu

Lent.az-ın “Associated Press” agentliyinə istinadən verdiyi məlumata görə, hələlik Xose Anhel Fernandesin hansı şəraitdə tutulduğu barədə məlumat verilmir.

Hüquq-mühafizə orqanları ancaq onu bildiriblər ki, Fernandes bir neçə gün öncə Kankun kurortunda narkokartelin 3 digər üzvü ilə bir yerdə tutulub. Axtarış zamanı onların üzərindən silah, dollar və peso ilə külli miqdarda pul, eləcə də “Zetas”ın Kintana-Roo ştatında pul mükafatı verdiyi şəxslərin siyahısı çıxıb.

“Zetas” kartelinə xüsusi xidmət orqanlarının keçmiş əməkdaşları rəhbərlik edirlər. Kartelin rəhbərləri 1990-cı illərin əvvəlində “Kartel de Qolf”a işləməyə başlayıblar. Amma bir neçə il sonra öz cinayətkar qruplarını yaratmaq qərarına gəliblər.

“Zetas” və “Kartel de Qolf” 2010-cu ilin əvvəlindən ABŞ-a narkotik göndərmək uğrunda şiddətli mübarizə aparırlar. Kartel üzvləri arasında tez-tez silahlı döyüşlər olur. Məsələn, 2010-cu ilin iyununda kartel üzvləri arasında Mazatla şəhərindəki atışma zamanı 28 nəfər ölüb.