Estoniya Müdafiə Nazirliyində atışma

APA-nın məlumatına görə, bir qədər əvvəl naməlum şəxs binanın içinə daxil olaraq atəş açıb. Bir müddət sonra atəş açılan yerdə atışma başlayıb. Hazırda binadan partlayış səsləri gəlir. Yerli media qurumları atışma başlamazdan əvvəl zirehli gödəkcəli və maskalı onlarla polis əməkdaşının binaya daxil olduğunu bildirir. Binada ilk atəş səsləri eşidildikdən sonra əməkdaşların hamısı təcili evakuasiya olunub, bir neçə nəfər isə özünü pəncərədən küçəyə atıb. Müdafiə Nazirliyinin binası mühasirəyə alınıb.

Binaya daxil olaraq atəş açan adamın kim olduğu açıqlanmır. Nazirlikdəki mənbə atışmanı tərxis olunmuş zabitin açdığını deyib. Həmin şəxsin binada bir neçə nəfəri girov saxladığı, sonra isə azad etdiyi güman olunur. Başqa bir məlumata görə, atəş açan şəxs binanın damına doğru hərəkət edir.