Səs-küydən, avtomobil hərəkətindən və izdihamlı çimərliklərdən uzaqda istirahət etmək istəyənlər üçün dünyanın ən sakit adalarının yeni reytinqi hazırlanıb. Siyahıya Yeni Zelandiyanın Stüart adası başçılıq edib.
Lent.az xəbər verir ki, “BookRetreats” şirkətinin hazırladığı “Unspoilt Index” çərçivəsində dünyanın 100 adası araşdırılıb. Reytinq hazırlanarkən peyk görüntülərindən və açıq xəritə xidmətlərinin məlumatlarından istifadə edilib.
Son dövrlərdə tam sakitlik və şəhər səs-küyündən uzaqlaşmağa hesablanan istirahət növünə maraq xeyli artıb. Hətta bunun üçün “quietcation”, yəni “sakit tətil” ifadəsi işlədilir. “Google Trends” məlumatlarının təhlilinə əsasən, son bir ildə “sakit istiqamətlər” ifadəsi üzrə axtarışların sayı 1268 faiz artıb.
Adalar hansı meyarlara görə qiymətləndirilib?
Tədqiqat zamanı adalar sakit mühitin formalaşmasına təsir edən altı əsas göstəriciyə görə qiymətləndirilib.
Bura təbii ərazilərin miqdarı, yol şəbəkəsinin sıxlığı, hava nəqliyyatının intensivliyi, əhali sıxlığı, gecə səmasının qaranlıq qalması və təbii sahil xəttinin uzunluğu daxil edilib.
Araşdırmada psixologiya professoru və sakitlik üzrə tədqiqatçı Olqa V. Lemannın işlərindən, həmçinin Avropa Ətraf Mühit Agentliyinin “sakit ərazi” anlayışından istifadə olunub. Prinsip sadə olub: ada nə qədər sakit, yaşıllıqla zəngin, gecələr qaranlıq və az tikilidirsə, reytinqdə bir o qədər yüksək yer tutub.
Birinci yerdə Stüart adasıdır
Reytinqin qalibi Yeni Zelandiyanın üçüncü ən böyük adası olan Stüart adası seçilib.
1680 kvadratkilometr ərazisi olan adada cəmi 500-ə yaxın insan yaşayır. Ərazinin təxminən 85 faizi qorunan milli parkın payına düşür.
Adanı daha maraqlı edən başqa bir göstərici isə burada yaşayan kivi quşlarının sayıdır. Stüart adasında təxminən 20 min nadir kivi yaşayır. Başqa sözlə, adada kivi quşlarının sayı insanlardan təxminən 40 dəfə çoxdur.
Adada yalnız kiçik bir uçuş-enmə zolağı var, iri avtomobil yolları isə demək olar ki, yoxdur. Bunun əvəzinə meşələrdən və sakit körfəzlərdən keçən təxminən 280 kilometrlik piyada marşrutları mövcuddur. Bu amillər insan fəaliyyətinin yaratdığı səs-küyü minimum səviyyədə saxlayır.
Stüart həmçinin “International Dark Sky” tərəfindən sertifikatlaşdırılan dünyanın ən cənub qaranlıq səma qoruğu hesab olunur. Burada ulduzları müşahidə etmək mümkündür, uyğun hava şəraitində isə cənub qütb parıltısını – “aurora australis”i görmək olar.
İkinci yerdə Yunanıstan adasıdır
Reytinqdə ikinci yeri Yunanıstanın Anafi adası tutub. Ada məşhur Santorinidən bərə ilə təxminən bir saatlıq məsafədə yerləşir.
Anafidə 300-dən az insan yaşayır və əhalinin sıxlığı Santorini ilə müqayisədə təxminən 30 dəfə aşağıdır. Turizm mövsümünün ən gərgin vaxtlarında belə Roukounas, Klisidi və Katsouni kimi çimərliklər nisbətən sakit qalır.
Maraqlıdır ki, Santorini eyni reytinqdə 100 ada arasında 99-cu yerdə qərarlaşıb. Buna adadakı sıx nəqliyyat infrastrukturu, beynəlxalq hava limanı və təbii ərazilərin nisbətən az olması təsir edib.
Avropanın digər sakit adaları
İngiltərənin Silli arxipelaqına daxil olan Sent-Martins adası dünya reytinqində beşinci olub. Burada avtomobil hərəkəti qadağandır və cəmi 135 nəfər yaşayır. Adada hava limanı yoxdur, 13 kilometrlik sahil xətti boyunca isə 12 çimərlik yerləşir.
Şotlandiyanın Skay adası 11-ci, Normand adalarındakı Herm isə 14-cü yeri tutub. Hermdə də avtomobil hərəkəti yoxdur və adada təxminən 60 nəfər yaşayır. Xorvatiyanın Mlet və Vis adaları da ilk iyirmilikdə qərarlaşıb.
Araşdırmaya əsasən, dünyanın ən sakit adalarının ilk beşliyi belədir:
- Stüart – Yeni Zelandiya
- Anafi – Yunanıstan
- İlya-Qrandi – Braziliya
- Lord-Hau – Avstraliya
- Sent-Martins – İngiltərə
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
