Şirvan şəhəri ilə Sabirabad rayonu arasında əlaqə kəsilib

Kür çayı Şirvanın Bayramlı qəsəbəsinin hər iki qoruyucu bəndini yararaq qəsəbəni basıb.

APA-nıın Mil-Muğan bürosunun xəbərinə görə, Bayramlı qəsəbəsi ərazisində yerləşən bəndin yarılması nəticəsində qəsəbənin böyük hissəsi su altındadır. Su axını böyük sürətlə Sabirabad istiqamətində “15 göz” adlanan dəmir yolu körpüsünün altına istiqamət alıb. Sabirabad - Salyan yolu təxminən 1,5 - 2 metr hündürlüyündə su altında qalıb. Sabirabad rayonunun bəzi kəndləri ilə rayon mərkəzini birləşdirən yeganə ana yol bağlanıb. Bu, Kür sahilində olan Minbaşı, Qarağac, Yaxa Dəlləy, Polad Toğayı, Azadkənd, Çağırğan, Xankeçən, Təzəkənd və Muğangəncəli kəndləridir. Həmin kəndlərə yalnız Salyan rayonu istiqamətindən giriş-çıxış var.

Son məlumata görə, Şirvan şəhəri ilə Sabirabad rayonunun əlaqəsi kəsilib. Kür Dövlət Yol Polisinin postu istiqamətində yolu yararaq Sabirabadın Qaragünə kəndinə tərəf istiqamət alıb.