Bakıda silahlı qarşıdurma

Hadisə iştirakçılarından biri tutuldu

İyulun 1-də Bakıda atışma hadisəsi olub. Lent.az-ın məlumatına görə, Azərbaycan Respublikası Daxili İşlər naziri Ramil Usubov hadisəni törədənlərin qısa vaxt ərzində tapıldığını bildirib.

Lent.az-ın əldə etdiyi məlumata görə, hadisə Suraxanı rayonunda baş verib. Hadisəni 3 avtomobillə avto-xuliqanlıq edən şəxslər törədib.

Daxili İşlər Nazirliyinin mətbuat xidmətinin rəis müavini Ehsan Zahidov Lent.az-a detalları açıqlayıb və bildirib ki, hadisəni törədənlərdən biri artıq tutulub. Ehsan Zahidovun bildirdiyinə görə, hadisə zamanı 3 avtomobil – 2 “VAZ 2107” markalı və 1 “Mercedes” markalı avtomobil avto-xuliqanlıq edib. Bundan sonra avtomobillərdə olanlar odlu silahdan atəş açıblar. Hadisə yerinə gedən polis ərazidən 3 ədəd giliz tapıb.

Avtomobillərin hər üçünün dövlət seriya nömrələri və sahiblərinin şəxsiyyətləri dərhal müəyyənləşib. Həyata keçirilmiş əməliyyat axtarış tədbirləri nəticəsində şəxsiyyətləri müəyyənləşib. Onlardan biri “VAZ 2107” markalı maşınlardan birinin sürücüsü Bakı sakini, 1983-cü il təvəllüdlü Anar Dadaşov artıq tutulub.

“Mercedes” markalı avtomobil isə tərk edilmiş halda Sabunçu qəsəbəsindən tapılıb
.

Digər iki nəfərin də axtarışları davam etdirilir. Cinayət Məcəlləsinin 221-ci (xuliqanlıq) və 228-ci (qanunsuz silah gəzdirmə) maddələri ilə cinayət işi açılıb.

Vüqar Baba