Ötən ay 4,372 partlamamış hərbi sursat zərərsizləşdirilib

2010-cu ilin iyun ayı ərzində 2.245.923 kvadrat metr ərazi yoxlanılıb, mina və patlamamış hərbi sursatdan (PHS) təmizlənib.

Bu barədə APA-ya ANAMA-dan məlumat verilib. Məlumata görə, bu müddət ərzində 4.372 PHS və mina aşkar edilərək zərərsizləşdirilib, 21 ədəd tank əleyhinə və 1 ədəd piyada əleyhinə mina tapılıb. Ümumilikdə təmizləmə əməliyyatına 426 mütəxəssis və 115 nəfər yardımçı heyət cəlb olunub. Həmçinin əməliyyatlarda 6 mexaniki minatəmizləmə maşını və 30 minaaxtaran it iştirak edir.

İndiyədək ümumiyyətlə ANAMA tərəfindən cəmi 135.426.941 kvadrat metr ərazi təmizlənib. Tapılıb zərərsizləşdirilmiş mina və PHS-lərin sayı 618.077-dir.
Agentlik tərəfindən təmizləmə əməliyyatları Tərtər, Ağdam, Füzuli, Ağstafa, Gədəbəy və Bakı şəhəri, Qaradağ rayonu ərazisində aparılır.

Qeyd etmək lazımdır ki, “Azneft” İstehsalat Birliyinin müraciətinə əsasən Agentlik tərəfindən Bakı şəhəri Lökbatan qəsəbəsində 18.146 kv.m, Bibiheybət qəsəbəsində isə 34.714 kv.m ərazinin təmizlənməsi əməliyatları başa çatıb. Əməliyyatlar ANAMA-nın Xüsusi Əməliyyat Qrupu tərəfindən beynəlxalq minatəmizləmə standartlarına uyğun olaraq həyata keçirilib.

BP Azərbaycan şirkətinin ANAMA-ya ünvanladığı məktuba əsasən, Agentlik tərəfindən Heydər Əliyev adına Bakı-Tbilisi-Ceyhan əsas ixrac neft, Cənubi Qafqaz qaz və Bakı-Supsa neft boru kəmərlərinin Ağstafa rayonu ərazisində 5000 kv.m ərazinin partlamamış hərbi sursatlarla təmizlənməsi əməliyyatları başa çatıb. 2010-cu ilin iyun ayı ərzində PHS hadisəsi qeydə alınmayıb.