Avtomobil oğruları yaxalandı

Ötən gün respublika ərazisində avtomobildən 4 oğurluq faktı qeydə alınıb. Şübhəlilər polis tərəfindən saxlanılıb. Lent.az Daxili İşlər Nazirliyinə istinadən baş verən oğurluq hadisələrinin təfərrüatlarını təqdim edir.

Gəncə şəhəri Nizami Rayon Polis İdarəsi əməkdaşlarının keçirdikləri əməliyyat-axtarış tədbirləri nəticəsində rayon ərazisində “VAZ-2107” markalı avtomobildən maqnitofon və akkumulyator oğurlamaqda şübhəli bilinən Gəncə şəhər sakini K.Allahverdiyev saxlanılıb.

Binəqədi Rayon Polis İdarəsi 5-ci Polis Bölməsinin əməkdaşları tərəfindən sentyabrın 7-də rayon ərazisində “Mitsubishi” markalı avtomobildən 1000 manat oğurlamaqda şübhəli bilinən Kürdəmir rayon sakinləri C.Şirəliyev saxlanılıb, onunla birlikdə olan daha 1 nəfərin şəxsiyyəti müəyyən edilib.

Kəpəz Rayon Polis İdarəsi əməkdaşlarının keçirdikləri əməliyyat-axtarış tədbirləri nəticəsində rayon ərazisindəki evlərin birindən su mühərriki və "Opel" markalı avtomobildən mobil telefon oğurlamaqda şübhəli bilinən Gəncə şəhər sakini, əvvəllər məhkum olunmuş Ş.Əsədov saxlanılıb.

Ətrafında aparılan tədbirlərlə onun V.Məmmədovun mobil telefonunu dələduzluq yolu ilə alması da müəyyən edilmişdir.

Masallı Rayon Polis Şöbəsinin əməkdaşları tərəfindən sentyabrın 7-də rayon ərazisində “Mercedes” markalı avtomobildən 550 manat oğurlamaqda şübhəli bilinən rayon sakini R.Rəhimov saxlanılıb.