Minlərlə avtomobil tıxacda qalıb - YENİLƏNİB

Hacıqabul-Bəhramtəpə avtomobil yolunun 8-ci km-də Kür çayı üzərində yerləşən körpüdə avtomobillərin hərəkəti dayanıb.

APA-nın Mil-Muğan bürosunun məlumatına görə, ağır tonnajlı avtomobilin yükünün körpüyə ilişməsi nəticəsində avtomobil körpünün üstündə dar yolda hərəkətsiz qalıb. Nəticədə hər iki istiqamətdə avtomobillərin hərəkətində ciddi problem yaranıb.

APA-nın hadisə yerində olan əməkdaşı xəbər verir ki, artıq 3 saata yaxındır, Sabirabad-Şirvan və əks istiqamətdə avtomobillər tək-tək, çox çətinliklə hərəkət edir.

Nəticədə ərazidə minlərlə avtomobilin tıxacı yaranıb.

Qeyd edək ki, Kür çayı üzərindəki körpüyə paralel yeni körpü inşa olunur.