İsraildə seçkilər başa çatdı: Netanyahunun bloku üstünlüyü ələ aldı

İsraildə keçirilən parlament seçkilərində səslərin hesablanması davam etdikcə Baş nazir Benyamin Netanyahunun rəhbərlik etdiyi blokun mandat sayı artır.

Lent.az xəbər verir ki, İsrail Mərkəzi Seçki Komissiyasının açıqladığı ilkin nəticələrə görə, seçki qutularının 32,5 faizindəki səslər hesablanıb.

Hazırkı nəticələrə əsasən, Netanyahunu dəstəkləyən partiyalar bloku 120 yerlik Knessetdə 59, ona qarşı çıxan müxalifət bloku isə 46 mandat əldə edir.

Qeyd olunur ki, səslərin hesablanmasının əvvəlki mərhələsində Netanyahunun blokuna parlamentdə çoxluq qazandıran nəticələr qeydə alınmışdı. Lakin sonrakı hesablamalar mandat bölgüsünü dəyişib.

Baş nazir yenilənmiş nəticələrdən sonra tərəfdarları ilə birlikdə seçkiləri qeyd etsə də, hələlik qələbəsini elan etməyib.

Məlumata görə, hazırda üç siyasi qüvvə parlamentə düşmək üçün tələb olunan 3,25 faizlik seçki baryerini keçə bilmir. Belə ki, “Reservists” partiyası 2,7 faiz, “People of Israel” 1,8 faiz, “Charedi Public” isə 0,3 faiz səs toplayıb.

Bununla belə, açıqlanan göstəricilər yekun nəticələr deyil və səslərin hesablanması davam etdikcə dəyişə bilər.

Xüsusilə hərbi qulluqçuların səsləri də daxil olmaqla, ikiqat zərflərdə verilmiş bülletenlər daha sonra hesablanacaq.

Xatırladaq ki, İsraildə hökuməti formalaşdırmaq üçün 120 yerlik Knessetdə ən azı 61 deputatın dəstəyi tələb olunur.