Marçello Lippi “Yuventus”a qayıdır

Lent.az-ın yerli nəşrlərə istinadən verdiyi məlumata görə, 62 yaşlı mütəxəssis “Yuventus”a rəhbərlik etməyə namizəddir. Hazırkı baş məşqçi Luici Del Nerinin işi klub rəsmilərini qane etmir. İtaliya çempionatının növbəti turunda “Yuventus” “Çezena”ya uduzsa, Del Neri istefaya göndəriləcək. 28 turdan sonra 41 xalla 7-ci pillədə qərarlaşan Turin komandası lider “Milan”dan 20 xal geri qalır.

Digər tərəfdən, uğursuz nəticələr kollektiv daxilindəki ab-havaya da təsir edib. Komandanın son məşqində müdafiəçi Corcio Kyellini ilə hücumçu Vinçentso Yakvinta dalaşıb. Onların hər ikisi İtaliya yığmasının üzvləridir. Münaqişəyə Kyellininin Yakvintaya qarşı kobud oyunu səbəb olub. Dalaşanları komanda yoldaşları ayırıblar.

Qeyd edək ki, Marçello Lippi 2010-cu il dünya çempionatından sonra işsizdir. O, karyerası ərzində ən böyük uğurlarını İtaliya yığmasında və “Yuventus”da qazanıb. Lippi “Skuadra Adzurra”nın sükanı arxasında 2006-cı ildə dünya çempionluğunu, “Qoca Sinyora”nın baş məşqçi postunda isə 1996-cı ildə Çempionlar Liqası, UEFA Superkuboku və Qitələrarası Kuboku əldə edib.