“Azəriqaz” alternativ və bərpa olunan enerjiyə keçir

Azərbaycan Respublikasının Prezidenti İlham Əliyevin 21 oktyabr 2004-cü il tarixli sərəncamı ilə təsdiq edilmiş “Azərbaycan Respublikasında alternativ və bərpa olunan enerji mənbələrindən istifadə olunması üzrə Dövlət Proqramı”nda nəzərdə tutulmuş tədbirlərin icrası və ətraf mühitin mühafizəsi məqsədilə ARDNŞ-in “Azəriqaz” İstehsalat Birliyinin qaz nəqli sistemlərində qazın daxili enerjisindən istifadə etməklə elektrik enerjisi istehsal etməyə imkan verən turbodetander qurğularının tətbiq edilməsi nəzərdə tutulub.

Lent.az-ın ARDNŞ-in rəsmi saytına istinadən verdiyi məlumata görə, bu məqsədlə “Azəriqaz”-ın təklifinə əsasən “Neftqazelmitədqiqatlayihə” İnstitutu tərəfindən “Azəriqaz”-ın “Qaradağ”, “Digah”, “Mingəçevir” və “Şirvan” Qazpaylayıcı Stansiyalarında (QPS) qazın təzyiq potensialından istifadə etməklə elektrik enerjisinin alınması üçün turbodetander qurğusunun tətbiq edilməsi məqsədilə texniki-iqtisadi əsaslandırma sənədi hazırlanıb. Hazırda “Mingəçevir” QPS-də quraşdırılacaq turbodetander qurğusunda istehsal ediləcək elektrik enerjisinin mövcud şəbəkəyə ötürülməsi üçün texniki şərtin verilməsi məqsədilə “Azərenerji” ASC-yə müraciət olunub. Planlaşdırılan işlərin həyata keçirilməsi üçün aidiyyatı olan qurumlar tərəfindən torpaq sahəsinin ayrılması məsələsi də həllini tapıb. Lazımi sənədlər toplandıqdan sonra obyekt üzrə layihə-smeta sənədlərinin işlənilməsinə başlanılacaq.