Azərbaycanda böyük kitabxanalarda xadimələrinin sayı azalacaq

Nazirlər Kabineti 2011-ci il 11 oktyabr tarixli 162 nömrəli qərarı ilə təsdiq edilmiş “Azərbaycan Respublikasının şəhər (rayon) mərkəzləşdirilmiş kitabxana sistemlərinin, müstəqil kitabxanaların, şəhər, qəsəbə və kənd kitabxana filiallarının, habelə şəhər, qəsəbə kütləvi, uşaq və gənclər kitabxanalarının nümunəvi strukturu və ştat vahidləri”ndə dəyişiklik edib. Lent.az-ın Nazirlər Kabinetinin rəsmi saytına istinadən verdiyi məlumata görə, bu, böyük kitabxanalarda xadimə ştatı vahidlərinin sayının azaldılmasını özünə ehtiva edir.

Bu vaxta qədər oxucularının sayı 60 min nəfərdən, illik kitab verilişinin miqdarı 1 milyon nüsxədən artıq olan mərkəzləşdirilmiş kitabxana sistemlərində təmizlənən hər 150 kv.m sahə üçün 1 ştat vahidi xadimə ayrılıb.

Bundan sonra isə təmizlənən sahə 300 kv.m-dək olduqda 0,5 ştat vahidi xadimə, 300 kv.m olduqda 1 ştat vahidi xadimə, sonrakı hər 150 kv.m üçün əlavə 0,5 ştat vahidi xadimə olacaq.

Qeyd edək ki, oxucularının sayı 60 min nəfərdən, illik kitab verilişinin miqdarı 1 milyon nüsxədən artıq olan mərkəzləşdirilmiş kitabxana sistemlərinin ştatları fərdi qaydada Maliyyə Nazirliyi ilə razılaşdırılaraq Mədəniyyət və Turizm Nazirliyi tərəfindən təsdiq olunur.