Milli üzüm genefondumuz məhv ola bilər

Qərb bölgəsində yetişdirilən üzüm satılmır

Qərb bölgəsində yetişdirilən üzüm məhsulu satılmır. Hazırda üzüm bağlarının sahəsi 4000 hektardan artıqdır. Bu sahələrdən 1400 hektarı 2009-cu ildə salınıb. Üzüm bağlarından 27700 tondan artıq məhsul götürülüb. Lakin fermerlər əldə olunan məhsulun yarısını sata bilmir. Bu barədə Lent.az-ın Gəncəbasar müxbirinə Azərbaycan Dövlət Aqrar Universitetinin üzümçülük kafedrasının müdiri Famil Şərifov məlumat verib.
Mütəxəssisin sözlərinə görə, məhsul satışında problemin müəyyən səbəbləri var. “Yetişdirilən məhsulun satışına mane olan amillərdən biri sahibkarların yerli üzümdən hazırlanan şərabı dünya bazarlarında, xüsusilə də Rusiyada sata bilməməsidir. Sahibkarlar Fransa, İtaliya kimi xarici ölkələrdən gətirilən üzüm sortlarına üstünlük verir. Hətta bu onlara daha baha başa gəlir. Üstəlik əcnəbi üzüm sortları Azərbaycanın iqliminə uyğunlaşa bilmir. Fermerlərin məhsulu kortəbii yetişdirməsi, marketinq araşdırması aparmaması da səbəblərdən biridir. Əcnəbi sortlardan istifadə isə milli üzüm genefondunun məhvinə səbəb ola bilər”, - deyə Famil Şərifov əlavə edib.
Vüsalə Cənnətova