2040-cı ilə qədər qlobal iqtisadiyyatda nə baş verəcək: Azərbaycan hansı mövqedə olacaq?

Kanadanın onlayn analitik platforması “Visual Capitalist”in analitikləri, Britaniyanın müstəqil konsaltinq şirkəti olan “İqtisadiyyat və biznes tədqiqatları mərkəzi”nin (CEBR) məlumatlarına və hesablamalarına əsaslanaraq, hərtərəfli bir araşdırma aparıblar və bunun əsasında 2040-cı ilə qədər qlobal iqtisadiyyatın vəziyyəti ilə bağlı proqnozlarını tərtib ediblər.

Lent.az-ın xarici mediaya istinadən xəbərinə görə, əldə edilən nəticələrə əsasən, adı çəkilən təşkilatın mütəxəssisləri belə bir nəticəyə gəliblər ki, qlobal iqtisadiyyatın ümumi həcmi 2040-cı ilə qədər təxminən 83 faiz artaraq 124 trilyon dollardan 227 trilyon dollara çatacaq.

Qlobal liderlər arasında kimlər olacaq?

Visual Capitalist analitiklərinin fikrincə, ABŞ hətta 13-14 il sonra belə qlobal iqtisadiyyatın əsas hərəkətverici qüvvəsi olaraq qalacaq. Onun nominal ümumi daxili məhsulunun (ÜDM) 52,885 trilyon dollara çatacağı proqnozlaşdırılır.

Lakin onun liderliyi artıq o qədər də mütləq görünməyəcək, çünki hazırda bu göstəriciyə görə dünyada ikinci yerdə olan Çin 2040-cı ilə qədər ABŞ ilə fərqini demək olar ki, minimum 5 trilyon dollara endirəcək və nominal ÜDM-ni 47,877 trilyon dollara çatdıracaq.

Birlikdə, onlar qlobal iqtisadiyyatın ümumi gəlirinin demək olar ki, yarısını təşkil edəcəklər.

2040-cı ilə qədər dünyanın ən böyük iqtisadiyyatlarına malik ilk on ölkəsi arasında Hindistan (14,092 trilyon dollar), Almaniya (7,783 trilyon dollar), Böyük Britaniya (6,784 trilyon dollar), Yaponiya (5,922 trilyon dollar), Fransa (5,203 trilyon dollar), İndoneziya (4,182 trilyon dollar), Braziliya (3,943 trilyon dollar) və Kanada (3,818 trilyon dollar) da yer ala bilər.

A treemap showing projected nominal GDP by country and region in 2040, led by the United States and China.

MDB-yə üzv ölkələrə gəldikdə, bu göstəriciyə görə ən yaxşı mövqedə Rusiya olacaq. Qazaxıstan 2040-cı ilə qədər nominal ÜDM-ə görə Rusiyadan geri qalacaq (3,247 trilyon dollarla 16-cı yer), lakin Özbəkistandan (342 milyard), Azərbaycandan (152 milyard), Belarusdan (113 milyard), Ermənistandan (69 milyard), Qırğızıstandan (54 milyard) və Tacikistandan (39 milyard) daha yüksək olacaq.

2040-cı ildə nominal ÜDM baxımından Avropanın bu ölkələrinin mövqeyi belə olacaq: Çexiya (630 milyard), Portuqaliya (588 milyard), Finlandiya (516 milyard), Macarıstan (413 milyard), Slovakiya (289 milyard), Bolqarıstan (221 milyard), Serbiya (213 milyard), Litva (193 milyard), Lüksemburq (179 milyard), Latviya (103 milyard) və Estoniya (92 milyard).

Ehtimal olunan autsayderlər

Tuvalunun 2040-cı ildə nominal ÜDM-ə görə qlobal miqyasda 190-cı yerdə qərarlaşacağı və ÜDM-nin 100 milyon dollar olacağı proqnozlaşdırılır.

Eyni dövrə qədər Nauru (300 milyon dollar), Marşal adaları (600 milyon dollar), Kiribati (600 milyon dollar), Palau (700 milyon dollar), Mikroneziya Federativ Ştatları (800 milyon dollar), Tonqa (900 milyon dollar), Dominika (1,4 milyard dollar), San-Tome və Prinsipi (1,7 milyard dollar) və Sent-Kits və Nevis (2,2 milyard dollar) kimi ölkələrdə iqtisadi göstəricilərin bir qədər yaxşı olacağı gözlənilir.