Bir vaxtlar sosial şəbəkədə video çəkmək əyləncə və ya hobbi hesab edilirdi. İndi isə dünyanın ən böyük kontent yaradıcıları Hollivud ulduzları və iri şirkət rəhbərləri ilə müqayisə olunan məbləğlər qazanırlar. Reklam, YouTube gəlirləri, podkastlar, şəxsi brendlər, məhsul satışı və hətta kino istehsalı bəzi blogerlərin illik qazancını yüz milyonlarla dollara çatdırıb.
Lent.az-ın əməkdaşının bu mövzu ilə bağlı araşdırmasını təqdim edirik:
“Forbes”in 2026-cı il “Top Creators” reytinqində ilk dəfə dünyanın 50 aparıcı kontent yaradıcısının ümumi illik gəliri 1 milyard dollar həddini keçərək 1,02 milyard dollara çatıb. Bu, əvvəlki ilin 853 milyon dollarlıq göstəricisindən 20 faiz çoxdur.
Siyahının mübahisəsiz lideri isə yenə MrBeast-dir.
1. MrBeast – 300 milyon dollar
Əsl adı Jimmy Donaldson olan MrBeast artıq sadəcə YouTuber deyil. “Forbes” onun illik qazancını 300 milyon dollar qiymətləndirir. 873 milyon ümumi izləyiciyə çatan internet ulduzunun YouTube kanalları ildə 5 milyarddan artıq baxış toplayır. Onun gəlirlərinin arxasında nəhəng büdcəli yarış və əyləncə videoları ilə yanaşı Feastables, Lunchly, Viewstats, oyuncaq və geyim biznesi dayanır. Beast Industries şirkətinin dəyərinin 5 milyard dollar səviyyəsində qiymətləndirildiyi bildirilir.
2. Dhar Mann – 65 milyon dollar
Dhar Mann qısa, emosional və ibrətamiz hekayələri böyük biznesə çevirib. Onun təxminən 200 nəfərlik komandası həftə ərzində 300 milyona yaxın baxış toplayan videolar hazırlayır. Kontenti 13 dilə tərcümə olunur. Əsas qazancı videolardan, reklamdan və böyük media tərəfdaşlıqlarından gəlir.
3. Steven Bartlett – 52 milyon dollar
“The Diary of a CEO” podkastının müəllifi Steven Bartlett müsahibəni milyonluq biznesə çevirənlərdəndir. Mətbəx masasından başladığı podkast bu gün kitablar, canlı tədbirlər, reklam müqavilələri və investisiyaları birləşdirən biznes imperiyasının mərkəzində dayanır.
4. Markiplier – 38 milyon dollar
Markiplier sərvətini əsasən oyun videoları ilə qurub. Ancaq o artıq kino sektoruna da keçib. Öz vəsaiti ilə çəkib prodüserliyini etdiyi “Iron Lung” filmi Şimali Amerikada minlərlə kinoteatrda nümayiş olunaraq 50 milyon dollar kassa gəliri əldə edib. Bundan başqa, onun podkastları və YouTube fəaliyyəti davam edir.
5. Rhett & Link – 37 milyon dollar
Rhett McLaughlin və Link Neal “Good Mythical Morning” proqramı ilə internetin ən böyük əyləncə brendlərindən birini yaradıblar. İldə təxminən 240 buraxılış hazırlayan duet yemək testləri, məşhurlarla proqramlar, kitablar və digər media layihələrindən gəlir götürür.
6. Charli D'Amelio – 18 milyon dollar
TikTok rəqsləri ilə məşhurlaşan Charli artıq gəlirini təkcə sosial şəbəkədən qazanmır. Broadway səhnəsinə çıxan 22 yaşlı fenomen eyni zamanda Prada səfiri və Kate Spade kimi markaların reklam simasıdır. Onun ümumi sosial media auditoriyası 200 milyonu keçir.
7. Druski – 20 milyon dollar
Drew Desbordes, yəni Druski qısa yumor və skeçləri milyonlarla dollara çevirib. YouTube, TikTok və Instagram-dan başlayan karyerası artıq televiziya reklamlarına və Hollivud layihələrinə qədər genişlənib. Onun gəlirlərinin mühüm hissəsini iri reklam müqavilələri təşkil edir.
8. IShowSpeed – 30 milyon dollar
IShowSpeed-in yolu kompüter oyunlarından başlayıb. Daha sonra futbol, Cristiano Ronaldo sevgisi və dünyanı gəzərək etdiyi çılğın canlı yayımlar onu qlobal fenomenə çevirib. Hazırda 184 milyonluq auditoriyası var və böyük brendlərlə reklam müqavilələri bağlayır.
9. Mark Rober – 30 milyon dollar
Keçmiş NASA mühəndisi Mark Rober elmi əyləncəyə çevirərək sərvət qazanır. Onun milyonlarla dollar büdcəsi olan bəzi videoları fizika, robototexnika və mühəndisliyi maraqlı eksperimentlərlə izah edir. Əsas fərq isə odur ki, Rober videodan kənarda da biznes qurub: CrunchLabs şirkəti uşaqlar üçün elmi dəstlər satır.
10. Codie Sanchez – 31 milyon dollar
Siyahının ən maraqlı simalarından biri keçmiş jurnalist və maliyyəçi Codie Sanchezdir. O, camaşırxana, avtomat satış aparatları və landşaft xidməti kimi “darıxdırıcı bizneslərdən” necə pul qazanmağı öyrədən videolarla milyonlarla izləyici toplayıb. Onun əsas mövzusu biznes və şəxsi maliyyədir.
Burada maraqlı detal var: “Forbes”in Top Creators sıralaması yalnız gəlirə görə tərtib edilmir. Reytinqdə qazancdan başqa auditoriyanın böyüklüyü, izləyicilərin aktivliyi və sahibkarlıq göstəriciləri də nəzərə alınır. Buna görə, məsələn, 31 milyon dollar qazanan Codie Sanchez reytinqdə 10-cu, 18 milyon dollar qazanan Charli D'Amelio isə 6-cı yerdədir.
Blogerlər əslində pulu haradan qazanırlar?
Rəqəmlər göstərir ki, ən böyük internet ulduzları artıq sərvətlərini yalnız YouTube və TikTok-un reklam ödənişlərindən qazanmırlar. MrBeast ərzaq və texnologiya biznesinə, Mark Rober elmi məhsullara, Steven Bartlett investisiya və mediaya, Charli D'Amelio moda reklamlarına, Codie Sanchez isə biznes təhsilinə keçib.
Başqa sözlə, sosial şəbəkə onlar üçün əsas gəlir mənbəyindən çox nəhəng auditoriya toplamaq vasitəsinə çevrilib.
Bu tendensiya Azərbaycan üçün də maraqlıdır. Yerli bloger bazarında qazanc rəqəmləri barədə etibarlı və sistemli açıq reytinq olmadığı üçün “Azərbaycanın ən çox qazanan blogeri”ni dəqiq müəyyənləşdirmək mümkün deyil. Lakin Azərbaycanda da Instagram, TikTok və YouTube auditoriyası şəxsi brend, reklam, restoran və gözəllik biznesi, onlayn satış, təlim və digər kommersiya layihələrinə yönəldilir.
Dünya təcrübəsinin verdiyi əsas mesaj isə dəyişib: artıq milyonçu olmaq üçün milyonlarla izləyicinin özü kifayət deyil. Ən çox qazanan blogerlər auditoriyanı öz biznesinin müştərisinə çevirə bilənlərdir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
