Tarakan südü və 1000 cüt alt paltarı – Alimlərin qəribə araşdırmaları

Bu il İq Nobel mükafatları elm dünyasının ən qeyri-adi və ilk baxışdan qəribə görünən araşdırmalarını bir araya gətirib.

Lent.az xəbər verir ki, sentyabrın 3-də Sürixdə keçirilən mərasimdə tarakan südündən tutmuş torpağa basdırılan alt paltarlarına qədər müxtəlif mövzularda aparılan tədqiqatlar mükafatlandırılıb.

İq Nobel mükafatlarının məqsədi insanları əvvəlcə güldürmək, daha sonra isə elmi mövzu barədə düşündürməkdir.

Mükafatlardan biri canlı bala doğan tarakan növünün südü üzərində aparılan araşdırmaya verilib. Alimlər müəyyən ediblər ki, bu tarakanların südündəki zülallar inək südündəki zülallardan təxminən üç dəfə çox enerji daşıyır. Araşdırmanın qeyri-adi mövzusuna baxmayaraq, tədqiqat tarakan südünün tərkibindəki zülalların quruluşunu və enerji potensialını öyrənməyə yönəlib.

Digər araşdırmada isə alimlər torpağın sağlamlığını öyrənmək üçün 25-dən çox ölkədə 1000 cüt eyni alt paltarı torpağa basdırıblar. İki aydan sonra paltarlar çıxarılaraq onların nə dərəcədə parçalandığı araşdırılıb. Bu üsul torpaqdakı canlı orqanizmlərin üzvi materialları necə parçaladığını və torpağın bioloji aktivliyini qiymətləndirməyə kömək edir.

Mükafatlandırılan digər tədqiqatlar arasında insanların və müxtəlif heyvanların öpüşməsinin təkamülünü araşdıran, burun üfürmənin aerodinamikasını öyrənən və hətta ilanların hansı hallarda insanı dişləməyə meylli olduğunu müəyyənləşdirməyə çalışan araşdırmalar da olub.

İq Nobel mükafatlarının əsas xüsusiyyəti də məhz budur: araşdırmalar gülməli və qəribə səslənsə də, onların arxasında real elmi suallar dayanır.