Alimlər bildirirlər ki, qəhvədən müvəqqəti imtina beynin fəaliyyətinə müsbət təsir göstərə bilər.
Lent.az xarici mediaya istinadən xəbər verir ki, araşdırma nəticələrinə görə, qəhvədən hətta iki həftəlik imtina impulsivliyi və stress səviyyəsini azalda bilər. Bundan əlavə, kofeinsiz qəhvəyə keçid yuxu keyfiyyətini və yaddaşı yaxşılaşdıra bilər.
Qəhvəsiz iki həftədən sonra orqanizmdə nə baş verir?
Tədqiqat University College Cork alimləri tərəfindən aparılıb. Araşdırmada 62 sağlam yetkin iştirak edib. Onların yarısı müntəzəm olaraq qəhvə içənlər, digər yarısı isə qəhvə qəbul etməyənlər olub. İştirakçıların vəziyyəti analizlər, yaddaş testləri və sorğular vasitəsilə qiymətləndirilib.
Əvvəlcə bütün iştirakçılar bioloji nümunələr təqdim edib və koqnitiv testlərdən keçiblər. Daha sonra qəhvə istifadəçilərinə iki həftə ərzində qəhvə tam qadağan olunub. Bundan sonra onlar 21 gün müddətində iki qrupa bölünüb: birinə kofeinli, digərinə isə kofeinsiz qəhvə verilib.
Nəticələr göstərib ki, müntəzəm qəhvə içənlərdə əvvəlcə impulsivlik və emosional reaktivlik daha yüksək olub. Lakin iki həftəlik fasilədən sonra bu göstəricilər azalıb. Qəhvə yenidən rasiona daxil edildikdə isə kofeinli qrupda narahatlıq səviyyəsi azalıb, kofeinsiz qəhvə qəbul edənlərdə isə yuxu, fiziki aktivlik və yaddaş testlərinin nəticələri yaxşılaşıb.
Araşdırma bağırsaq mikrobiomunda dəyişikliklər də aşkar edib. Qəhvə sevənlərdə mikrobiom fərqli olub, lakin qəhvədən imtina etdikdən sonra bu fərqlər qismən aradan qalxıb. Bundan başqa, qəhvə iltihab göstəricilərinə də təsir edib: qəhvə istifadəçilərində ilkin mərhələdə iltihab daha aşağı olub, imtina etdikdən sonra artıb, yenidən qəhvə qəbulundan sonra isə azalıb.
Bununla belə, alimlər qeyd edirlər ki, bu tədqiqat qəhvə ilə sağlamlıq və ya koqnitiv funksiyalar arasında birbaşa səbəb-nəticə əlaqəsini tam sübut etmir. Nümunə sayı az olub və bəzi nəticələr testlərə öyrəşmə ilə izah oluna bilər. Qəti nəticələr üçün daha geniş araşdırmalara ehtiyac var.
Gündə neçə fincan qəhvə içmək olar?
Əvvəlki tədqiqatlar göstərir ki, psixi sağlamlıq baxımından ən faydalı variant orta miqdarda, gündə təxminən 2-3 fincan qəhvə qəbuludur. Bu miqdar xüsusilə kişilərdə psixi pozuntular riskinin azalması ilə əlaqələndirilir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
