Kənd uşaqları sağlam qidalanmır - ARAŞDIRMA

Alimlər kənd yerlərində yaşayan bir çox uşaqların erkən yaşlarından duz və şəkərli qidalardan daha çox istifadə etdiklərini açıqlayıblar.

Lent.az xarici mətbuata istinadən xəbər verir ki, belə qidalara hot-doqlar, çipslər, şirniyyatlar və şirələri misal göstərmək olar.

Tədqiqatın nəticələri Amerika Qidalanma Cəmiyyətinin əsas illik toplantısı olan “NUTRITION 2023”də təqdim olunub.

Tədqiqatçılar Pensilvaniya kəndlərində yaşayan iki yaşından kiçik 10614-dən çox uşağın məlumatlarını təhlil ediblər. Tədqiqatda iştirak edən uşaqların yarıdan çoxuna (53 faiz) sosiska kimi yüksək natriumlu ətlər, 37 faizinə kartof çipləri də daxil olmaqla duzlu qəlyanaltılar və üçdə birinə (34 faiz) tortlar, peçenye və ya pudinqlər verilib. Bundan əlavə, uşaqların 27 faizi kiçik yaşlarından şəkərli şirə qəbul ediblər.

“Bu məhsulların uşaqlar üçün tövsiyə edilmədiyini nəzərə alsaq, bu rəqəmlər həyəcan vericidir. Şəkər, yağ və natriumda yüksək olan qida və içkilərin erkən istehlakı körpələrin və uşaqların sağlam böyüməsi və inkişafı üçün potensial olaraq mənfi nəticələrə səbəb ola bilər” , - deyə tədqiqatçılar bildirib.

Körpələrin yarısından azı (46 faiz), pəhriz qaydaları ilə tövsiyə olunduğu kimi, həyatının ilk altı ayı ərzində yalnız ana südü qəbul edib. ABŞ-ın hazırkı qidalanma qaydalarına əsasən, 100 faiz meyvə və ya tərəvəz şirələri ən azı bir yaşında istehlak edilə bilər.

Şəkər və ya yüksək natrium tərkibli qidalar və içkilər iki yaşından kiçik uşaqlar üçün tövsiyə edilmir. Bu təlimatlar artıq çəki və piylənmə, diabet, astma və digər xroniki xəstəliklərin riskini azaltmaq üçün hazırlanmışdır.