Süni intellekt adi elektrokardioqrammada (EKQ) ürək çatışmazlığı və ürək qapaqları ilə bağlı problemlərin əlamətlərini bir neçə saniyə ərzində müəyyən edə bilər. Yeni texnologiya daha ətraflı müayinəyə ehtiyacı olan pasiyentləri daha tez seçməyə kömək edə bilər.
Lent.az xarici mediaya istinadən xəbər verir ki, alimlər EKQ nəticələrinin süni intellekt vasitəsilə sürətli analizini təklif edirlər.
EKQ təxminən 100 ildir ürək döyüntülərinin tezliyini və ritmini qiymətləndirmək üçün istifadə olunur. Lakin bu müayinə hər zaman ürək çatışmazlığını və ya qapaq xəstəliklərini aşkar etməyə imkan vermir.
Belə hallarda pasiyentlərə adətən exokardioqrafiya təyin edilir. Bəzi hallarda isə bu müayinə üçün gözləmə müddəti aylarla davam edə bilər.
Nəticəni saniyələr ərzində verir
Yeni alqoritm EKQ nəticəsini bir neçə saniyə ərzində təhlil edərək ürək çatışmazlığı və ya qapaq xəstəlikləri riskinin yüksək olub-olmadığını müəyyənləşdirə bilir.
Tədqiqatın nəticələri Münhendə keçirilən Avropa Kardiologiya Cəmiyyətinin konqresində təqdim olunub.
ABŞ-dan 67 min pasiyentin iştirak etdiyi araşdırmada süni intellekt ürək çatışmazlığı hallarının 81 faizədək, ürək qapaqları xəstəliklərinin isə 90 faizədək hissəsini müəyyən edə bilib.
Dünyada ildə təxminən 1 milyard EKQ aparılır
Mütəxəssislər texnologiyanın perspektivli olmasının əsas səbəblərindən birinin EKQ-nin geniş yayılması olduğunu bildirirlər. Dünyada hər il təxminən 1 milyard EKQ müayinəsi aparılır.
Kardioloq Sonya Babu-Narayan bildirib ki, süni intellekt artıq elektrokardioqrammaları demək olar ki, dərhal təhlil edə bilir.
Onun sözlərinə görə, bu texnologiya bütün ürək xəstələrini aşkarlaya bilməsə də, yüksək risk qrupunda olan şəxsləri daha erkən müəyyənləşdirmək üçün effektiv vasitəyə çevrilə bilər.
“Ürək xəstəliklərinin erkən diaqnostikası və müalicəsi insan həyatını xilas edir və həyat keyfiyyətini əhəmiyyətli dərəcədə yaxşılaşdırır”, – kardioloq bildirib.
Süni intellekt yekun diaqnoz qoymur
Mütəxəssislər vurğulayırlar ki, süni intellekt yekun diaqnoz qoymur və ürək çatışmazlığı və ya qapaq xəstəliyinin olmadığını tam şəkildə istisna edə bilməz.
Sistem yalnız riskin yüksək olduğu pasiyentləri sürətlə müəyyənləşdirə bilər.
Bu isə həmin şəxslərin exokardioqrafiyaya daha tez yönləndirilməsinə, gözləmə müddətinin azalmasına və müalicənin daha erkən başlamasına imkan yarada bilər.
Xəstəxanalarda bütün EKQ-ləri avtomatik yoxlaya bilər
Alimlər hesab edirlər ki, gələcəkdə süni intellekt xəstəxanalarda aparılan bütün EKQ müayinələrini avtomatik şəkildə təhlil edə bilər.
Beləliklə, EKQ başqa səbəbdən çəkilsə belə, sistem ürək xəstəliyi riski olan pasiyentləri müəyyənləşdirə bilər.
Tədqiqatçılar həmçinin tibb işçiləri üçün süni intellektlə təchiz edilmiş portativ EKQ cihazlarının hazırlanmasını da nəzərdən keçirirlər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
