Xaricdə oxuyan azərbaycanlı tələbələrin təbliğat şəbəkəsi yaradılır

Məqsəd Azərbaycan həqiqətlərini dünya ictimaiyyətinə çatdırmaqdır

Azərbaycan Tələbələr Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Xaricdə oxuyan azərbaycanlı tələbələrin təbliğat şəbəkəsi” adlı layihənin icrasına başlayıb.

Azərbaycan Tələbələr Birliyinin mətbuat xidmətindən Lent.az-a verilən məlumata görə, layihənin əsas məqsədi xaricdə oxuyan azərbaycanlı tələbələr vasitəsilə Azərbaycan həqiqətlərini dünya ictimaiyyətinə çatdırmaqdan ibarətdir.

Bu məqsədə nail olmaq üçün xaricdə oxuyan azərbaycanlı tələbələrdən ibarət şəbəkə formalaşdırılmalı və bütün fəaliyyət bu şəbəkə vasitəsilə həyata keçirilməlidir. Layihə çərçivəsində Azərbaycan haqqında təbliğat materiallarının çoxaldılması, həmin materialların xarici dillərə tərcümə edilməsi, xaricdəki tələbələrimizin reallaşdırmaq istədikləri müxtəlif tədbirlərin dəstəklənməsi və s. nəzərdə tutulur.

Azərbaycan Tələbələr Birliyi bu kimi fəaliyyətlərlə həm Avropada, həm də dünyada Azərbaycan diaspor işinin qurulmasına yardımçı olmaq niyyətindədir.