Gənc Alimlərin I Elm Festivalı keçirəcək

Azərbaycan Milli Elmlər Akademiyasının (AMEA) Rəyasət Heyətinin dəstəyi ilə Azərbaycan Gənc Alim, Aspirant və Magistrlər Cəmiyyəti və AMEA-nın Gənclərin İntellektual İnkişaf Mərkəzi tərəfindən 11-16 may tarixlərində Gənc Alimlərin I Elm Festivalı keçiriləcək.

Lent.az-ın AMEA-nın rəsmi saytına istinadən verdiyi məlumata görə, festival çərçivəsində bir sıra tədbirlər keçiriləcək. Bura “Beynəlxalq kimya ili – 2011: nəzəri-eksperimental kimyanın problemləri gənc alimlərin araşdırmalarında” və “Gənc alimlərin elmi tədqiqatlarının müasir istiqamətləri” adlı konfranslar, “Səfəvilər dövləti – 510: Azərbaycan dövlətçilik tarixi gənc alimlərin araşdırmalarında” adlı seminar, “Qarabağ həqiqətləri gənc alimlərin tədqiqatlarında” adlı dəyirmi masa və “Açıq qapı günləri: istedadlı uşaq və gənclərlə gənc alimlər arasında əməkdaşlıq münasibətlərinin qurulması, elmi laboratoriyalarla tanışlıq və elmi təqdimatların keçirilməsi” daxildir.

Gənc Alimlərin I Elm Festivalında AMEA-da çalışan və müxtəlif elm sahələri üzrə araşdırmalar aparan gənc alim, elmi işçi, laborant və doktorantlar iştirak edə bilərlər. Tədbirlərdə digər elmi-tədqiqat müəssisələrində, universitetlərdə fəaliyyət göstərən elmi tədqiqatçılar da iştirak edə bilərlər.

Tədbirlərdə iştirak etmək istəyənlər tezis və məqalələrini mayın 2-ə qədər göndərə bilərlər. Tezis (3 səhifəyə qədər) və məqalələr (10 səhifəyə qədər) “Times New Roman” şriftində, elektron formada ([email protected], [email protected] və yaxud [email protected] ünvanına) göndərilməlidir. Tezis və məqalələrin üzərində ad və soyad, elmi müəssisənin adı, əlaqə vasitələri (telefon, e-poçt) göstərilməlidir. Tədbirlərdə iştirak edənlərin tezis və ya məqalələri nəşr olunacaq.