Milli Qəhrəman Yusif Əliyevin xatirəsi onun adı verilən məktəbdə anılıb - FOTO

Bu gün “Bakı şəhər Qaradağ rayon Qobustan qəsəbəsində 195 saylı orta məktəbdə Milli Qəhrəman” qəzetinin təşkilatçılığı ilə Azərbaycanın Milli Qəhrəmanı Yusif Əliyev anım günü ilə bağlı tədbir keçirilib.

Lent.az-ın məlumatına görə, tədbirdə “Milli qəhrəman” qəzetinin baş redaktoru Mirbəşir Seyidzadə, Qaradağ rayon İcra hakimiyyətinin şöbə müdiri, Milli Qəhrəman ailələri, Milli Qəhrəman Yusif Əliyev adına 195 saylı məktəbin direktoru və müəllim kollektivi, şagirdlər, ictimaiyyət nümayəndələri, Milli Qəhrəmanın qohumları və yaxınları iştirak edib.

Tədbirdə Milli Qəhrəmanlar Beynəlxalq İnformasiya Mərkəzinin sədri, «Milli Qəhrəman» qəzetinin baş redaktoru Mirbəşir Seyidzadə geniş nitq söyləyib. O, Azərbaycanın İlk Milli qəhrəmanlarından olan Əliyev Yusif Əliyusif oğlunun həyatından, keçdiyi çətin və şərəfli döyüş yolundan danışıb.

M.Seyidzadə tədbir iştirakçılarına Azərbaycanın tarixini, keçdiyi döyüş yollarını, qəhrəmanlarını bir-bir öyrənməli, tanımalı və tanıtmalı olduqlarını bildirib: “Yusif də sizin kimi bu məktəbdə təhsil alıb. Siz gənclər də ona bənzəməli, onun göstərdiyi şücaəti bir tarix kimi yaddaşlarınızda saxlamalısınız”. Qəzet redaktoru çıxışının sonunda bu tədbirin keçirilməsinə şərait yaratdıqlarına görə Qaradağ Rayon İcra hakimiyyəti başda olmaqla, məktəbin rəhbərliyinə minnətdarlıq edilib.

Milli Qəhrəmanın atası Əliyusif Əliyev oğlu Y.Əliyevin uşaqlıq illərindən və döyüş bölgəsində göstərdiyi şücaətindən danışaraq tədbiri təşkil etdiyinə görə M.Seyidzadəyə, rayon İcra Hakimiyyətinə, məktəbin direktoruna və tədbirdə iştirak edən hər kəsə minnətdarlığını bildirib.