Gündə 20 saat yatan xalqın maraqlı HƏYATI

Təsəvvür edin, gün batanda oyanırsınız, bir saatlıq balıq ovundan sonra meyvə yeyirsiniz və yağışın səsi altında yenidən yuxuya gedirsiniz. Nə zəngli saat, nə iş, nə də stress var.

Bu “tənbəllik” deyil. Bu, Amazon cəngəlliklərində yaşayan piraha xalqının fəlsəfəsidir. Onların həyat tərzi antropoloqların “produktivlik” anlayışını tamamilə dəyişib.

Lent.az xarici mediaya istinadən bu xalq haqqında məlumat verir.

Niyə onları “ən tənbəl xalq” adlandırırlar?

Piraha xalqı yuxunu bir sənət formasına çevirib. Onlar gündə 5-6 dəfə, 2-3 saatlıq yuxularla kifayətlənirlər. Bu parçalı yuxu rejimi ümumilikdə 20 saata qədər çəkir.

Yemək tapmaq üçün gün ərzində cəmi 52 dəqiqə vaxt sərf edirlər. Balıq ovlamaq, meyvə və qoz toplamaq kifayət edir. Heç bir plan, ehtiyat toplamaq və ya artıq əşya yığmaq vərdişləri yoxdur. Onlar yalnız “indi və burada” prinsipi ilə yaşayırlar.

Onlar niyə tənbəl deyil?

Bu xalqın həyat tərzi ilk baxışdan tənbəllik kimi görünsə də, əslində bu, tropik şəraitə mükəmməl uyğunlaşma strategiyasıdır.

40 dərəcə istidə və 90% rütubətlikdə fiziki fəaliyyət tez yorğunluq yaradır.

Qısa fasilələrlə yuxuya getmək isə bədəni sürətlə bərpa etməyə imkan verir.

Üstəlik, onlarda müasir dünyanın xəstəlikləri, piylənmə, şəkərli diabet, depressiya yoxdur.

30 il piraha xalqı ilə yaşayan antropoloqun müşahidələri

Antropoloq Daniel Everett, pirahalarla 30 il yaşayıb və onların gündə 8 saat işləməyin dəlilik olduğunu düşündüklərini deyir:

“İşlədiyimi eşidəndə sadəcə güldülər. Onlar üçün bu ağlasığmazdır”.

Bu həyat tərzi niyə bizə uyğun deyil?

Piraha xalqının strategiyası resurslarla dolu cənnət şəraitində işləyir. Ətrafda çoxlu balıq, 200-dən çox yeməli meyvə növü var, amma nə yırtıcı, nə də düşmən var. Lakin şəhər mühitində bu rejim aclıq və sosial uyğunlaşma problemləri ilə nəticələnə bilər. Buna baxmayaraq, onların “bu anı yaşa” fəlsəfəsi bizim stress səviyyəmizi 70 faizə qədər azalda bilər.

Təbiiliyin verdiyi azadlıq

Texnologiyadan uzaqlaşıb “rəqəmsal detoks” üçün qurğular alırıq. Piraha xalqı isə həqiqi azadlığa sadə yollarla çatıb. Onlar lazımsız şeyi toplamırlar, bədənləri istəyəndə yatırlar, problemlərə gülürlər, çünki onlar günəş batmadan yoxa çıxır.

Psixoloqların fikrincə, onlar tənbəl deyil, azaddır. Biz isə təsəvvürümüzdəki sabahın köləsinə çevrilmişik.