Şüşə butulkaların gözlənilməz təhlükəsi AÇIQLANDI

Fransa Qida təhlükəsizliyi agentliyi şüşə qablara tökülən su, soda, pivə və şərabların plastik və ya dəmir qablarda eyni içkilərdən dəfələrlə çox mikroplastik olduğunu aşkar edib.

Lent.az bildirir ki, “Agence France-Presse”nin xəbərinə görə, alimlər Fransada satılan məşhur içkiləri araşdırıblar.

Agentliyin araşdırma direktoru Qiyom Dyuflo onların məqsədinin qablaşdırma növünün mikroplastiklərin səviyyəsinə necə təsir etdiyini öyrənmək olduğunu söyləyib. Məlum olub ki, orta hesabla şüşə butulkadakı bir litr içkinin tərkibində 100-ə yaxın mikroplastik hissəcik var.

Araşdırma aparan aspirant İselin Şaib deyib: “Biz bunun əksini gözləyirdik”.

Onun sözlərinə görə, məlum olub ki, mikroplastik hissəciklər şüşə qabların qapaqlarının kənarındakı boyanın forması, rəngi və tərkibinə uyğun gəlir. Çox güman ki, saxlama zamanı qapaqlar bir-birinə toxunur və sürtülür, mikrohissəciklərin sərbəst buraxıldığı görünməz cızıqlar yaradır.

Eyni zamanda, içməli suda mikroplastiklərin səviyyəsi bütün növ qablarda nisbətən aşağı olub – şüşə butulkalarda litrdə 4,5 hissəcikdən plastik qablarda 1,6 hissəyə qədər. Şərab, hətta şüşədə də minimal dəyərlər göstərib. Bu xüsusiyyətin səbəbləri hələ aydın deyil.

Qazlı su və pivə kimi içkilər üçün səviyyə daha yüksək olub: litrdə 30-dan 60-a qədər hissəciklər. Buna baxmayaraq, elm adamlarının fikrincə, bu cür dəyərlərin insan sağlamlığı üçün təhlükə törətdiyini söyləmək hələ mümkün deyil - mikroplastiklər üçün toksiklik həddi müəyyən edilməyib.

Bununla belə, agentlik istehsalçılara qapaqları təmizləmək üsullarını təkmilləşdirməyi təklif edir: hava ilə üfürmək, ardınca su və spirtlə yaxalamaq çirklənməni 60 faiz azalda bilər.