Yaponlar Azərbaycanla nəyi bölüşəcəklər?

Yaponiyanın İqtisadiyyat, Ticarət və Sənaye Nazirliyi, Mitsubishi elektrik korporasiyası, Mitsubishi Ağır Sənaye MMC və başqa şirkətlərinin daxil olduğu nümayəndə heyəti Rabitə və İnformasiya Texnologiyaları Nazirliyində olub. Bu barədə Lent .az-a nazirliyin mətbuat xidmətindən məlumat verilib.

Rabitə və informasiya texnologiyaları naziri Əli Abbasov onlara ölkədə İKT sektorunda həyata keçirilən işlərlə bağlı məlumat verib. Bildirib ki, Azerspace-1 telekommunikasiya peykinin orbitə buraxılması ilə bu sahədə yeni bir mərhələnin başlanğıcı qoyulub. Növbəti telekommunikasiya peykinin orbitə çıxarılması üçün hazırlıq işlərinin aparıldığını qeyd edən nazir Azərbaycan-Yaponiya Kosmik Sektor Seminarının ölkələr arasında bu sahədə əlaqələrin inkişafına töhfə verəcəyini deyib.

Yaponiya nümayəndə heyətinin rəhbəri Mitsubishi Electric korporasiyasının böyük vitse-prezidenti Takashi Sasakava Bakıda Azərbaycan-Yaponiya Kosmik Sektor Seminarının keçirilməsinə göstərilən dəstəyə görə Rabitə və İnformasiya Texnologiyaları Nazirliyinə minnətdarlığını bildirib. O qeyd edib ki, informasiya texnologiyalarının inkişafı üzrə dünyanın aparıcı ölkələrindən hesab olunan Yaponiya Azərbaycanla təcrübələrini bölüşməyə hazırdır.

Sonda Yaponiyanın İKT sektoru üzrə tanınmış şirkətləri barədə geniş təqdimat olub.