Oteldə hansı mərtəbədə qalmaq daha yaxşıdır: çox vacib detal AÇIQLANDI

Tətil planlaşdırarkən turistlərin əksəriyyəti əsas diqqəti yaşayışın qiyməti, otelin yerləşmə yeri, rəylər və interyer fotolarına yönəldir. Lakin çox vaxt nəzərə alınmayan kiçik, amma vacib bir detal var - doğru mərtəbənin seçilməsi.

Lent.az xarici mediaya istinadən təhlükəsizlik, sakitlik və rahatlıq baxımından hansı mərtəbənin daha yaxşı olduğunu izah edir.

Niyə birinci və ikinci mərtəbədə qalmaq məsləhət görülmür?

Baxmayaraq ki, bu mərtəbələrdən resepsiyaya və restorana çıxmaq rahatdır, onların bir sıra mənfi cəhətləri var. Əsas çatışmazlıqlardan biri küçədən gələn səs-küydür, xüsusən də otel mərkəzi küçədə və ya yol kənarında yerləşirsə.

Bundan əlavə, pəncərə və eyvan vasitəsilə otaqlara qanunsuz daxilolma riski yüksəkdir, birinci və ikinci mərtəbə cinayətkarlar üçün ən əlçatan hədəflərdir. Həm də otellər bu mərtəbələrə çox vaxt böyük turist qruplarını yerləşdirirlər, bu da dəhlizlərdə davamlı səs-küy və narahatlıq yaradır. Hərçənd qiymət cəlbedici ola bilər, riskləri də nəzərə almaq vacibdir.

Ən yuxarı mərtəbələr həmişə yaxşı seçim deyil

Bəziləri hesab edir ki, ən yüksək mərtəbələr lüks, səssizlik və mənzərə deməkdir. Lakin reallıqda bu mərtəbələr həmişə rahat olmur. Təcili hallarda liftlər çox vaxt işləmir və 10–15-ci mərtəbədən piyada enmək çətin ola bilər. Həmçinin bu mərtəbələrdə texniki otaqlar yerləşə bilər, bu isə səs-küy yaradır və Wi-Fi zəif ola bilər. Yəni ən yuxarı mərtəbəni seçməzdən əvvəl düşünmək lazımdır, bu, həqiqətən sizin rahatlığınıza uyğundurmu?

Ən optimal mərtəbələr hansılardır?

3-cü ilə 6-cı mərtəbə arası mütəxəssislərin fikrincə, oteldə qalmaq üçün ən ideal “qızıl orta”dır. Bu mərtəbələr küçə və lobbi səsindən qorunur, lazımi səviyyədə gizlilik və sakitlik təmin edir və təhlükə anında təcili yardım və yanğınsöndürənlərin çatması üçün əlçatandır.

Yanğınsöndürən nərdivanlar adətən 6-cı mərtəbədən yuxarıya çatmır, bu isə fövqəladə vəziyyətdə real təxliyə imkanı üçün vacibdir. Üstəlik, bu mərtəbələrdən gözəl mənzərə açılır, və pəncərələr qarşısında avtomobil və hasar kimi maneələr olmur.