Milli Qəhrəman Şövqiyar Abdullayev haqqında kitab təqdim olundu - FOTO

Bu gün Azərbaycanın Milli Qəhrəmanı Şövqiyar Cəmil oğlu Abdullayevin anım mərasimi keçirilib. Lent.az xəbər verir ki, tədbirdə çıxış edən jurnalist Hikmət Məlikzadə Abdullayevin həyat yolundan və dövlət tərəfindən onun qəhrəmanlığına verilən qiymətdən danışıb. Daha sonra Milli Qəhrəmanın atası Cəmil Abdullayev çıxış edərək oğlu ilə bağlı xatirələrini bölüşüb. Tədbirdə eyni zamanda Milli Qəhrəmana həsr olunmuş “Şövqiyar” kitabının təqdimatı da keçirilib. Kitabın müəllifi Natella Asenadır (Hacıyeva). Kitabda Ş.Abdullayevin həyat yolu, keçdiyi döyüş səhnələri və tanıyanların onun haqqında xatirələri yer alıb.

Qeyd edək ki, Şövqiyar Abdullayev 5 aprel 1969-cu ildə Qərbi Azərbaycanın Göyçə mahalının Basarkeçər rayonunun Nərimanlı kəndində anadan olub. 1989-cu ildə Monqolustanda Sovet Ordusunun tank qoşunları hissəsində hərbi xidmətini başa vuraraq Azərbaycana qayıdıb və könüllü olaraq erməni təcavüzkarlarına qarşı döyüşlərə qoşulub. O, 1992-ci ilin avqustun 27-də Ağdərə rayonu, Sərhəng su hövzəsi yaylağında gedən döyüşlərdə qəhrəmancasına həlak olub. Ş.Abdullayevə 5 fevral 1993-cü ildə Milli Qəhrəman adı verilib.