Bakıda oğru “iş başında” öldü

Martın 18-nə keçən gecə Bakıdakı zavodlardan birində ölüm hadisəsi baş verib. Xəzər rayon Prokurorluğundan Lent.az-a verilən məlumata görə, Qala qəsəbəsi ərazisində yerləşən Bakı Neft-Qaz-Mədən Avadanlıqları zavodunun ərazisindəki elektrik yarımstansiyasında kişi meyiti tapılıb.

Sonrakı araşdırmalar zamanı məlum olub ki, ölən şəxs paytaxt sakini, 1968-ci il təvəllüdlü İsmayılov Elşən Yolçu oğludur. O da məlum olub ki, E.İsmayılov zavodunun ərazisinə oğurluq məqsədi ilə gəlibmiş. O yarımstansiyadakı qiymətli metalları və yüksək ötürücülü naqilləri kəsərkən elektrik cərəyanı vurması nəticəsində ölüb.

Faktla bağlı araşdırma başlanılıb.

Nizam RZA