Gömrükdə qaçaqmalçılıq hallarının qarşısı alınıb

Gömrük orqanları qaçaqmalçılıq hallarının qarşısını alıb. Dövlət Gömrük Komitəsinin mətbuata xidmətindən Lent.az.-a verilən məlumata görə, Rusiya Federasiyasından Azərbaycana gələn Rusiya vətəndaşı Alıyev Rafig Maharram oğlunun idarə etdiyi “Mercedes Benz Vito” markalı Y 478 CY 161 dövlət nömrə nişanlı nəqliyyat vasitəsinə Tovuz Gömrük İdarəsinin “Sınıq Körpü” gömrük postunda gömrük nəzarəti həyata keçirilib.Yoxlama zamanı nəqliyyat vasitəsinin salonunda arxa oturacaq və söykənəcək hissədə xüsusi düzəldilmiş gizli saxlanc yerlərindən 2000 qutu üzərində aksiz markası olmayan ”Marlboro” siqaretləri aşkar olunaraq götürülüb.

Spirtli içkilərin və tütün məmulatlarının qaçaqmalçılığı ilə bağlı daha bir fakt isə Gəncə və Sumqayıt Gömrük idarələrinin birgə keçirdiyi əməliyyata nəticəsində aşkar edilib. Əməliyyat zamanı Gəncə şəhər sakini 30 yaşlı Əskərov Toğrul Ramiz oğlunun idarə etdiyi VAZ 21074 markalı avtomobilə baxış keçirilib. Avtomobilin salonundan üzərində aksiz markası olmayan xaricdə istehsal olunan 176 ədəd araq, 2 ədəd viski, 8 ədəd şərab , 13 enerji içkisi , eyni zamanda müxtəlif markalı 564 qutu siqaretlər aşkar edilərək götürülüb.

Daha bir qaçamalçılıq hallının qarşısı Balakən Gömrük İdarəsi tərəfindən alınıb. “Mazımçay” gömrük postunda isə Türkiyədən Azərbaycana gələn Türkiyə vətəndaşı Sabuncu Tanerin idarə etdiyi “Mercedes Benz” markalı 08K6425/08K6495 nömrə nişanlı yük avtomobilinə gömrük baxışı keçirilib. Gömrük baxışı zamanı avtomobildən invoysda göstərilməyən və gömrük orqanına düzgün bəyan olunmayan 14 adda 94 min 271 ədəd elektrik, santexnika avadanlıqları və tikinti malları aşkar olunub.

Hər üç faktla bağlı araşdırma aparılır