[b]Sevgilisini bir bıçaq zərbəsi ilə qətlə yetirən son söz söylədi[/b]

Sevgilisini qətlə yetirməkdə təqsirləndirilən Sergey Vorobyovun cinayət işi üzrə məhkəmə prosesi davam edib.

Lent.az-ın məlumatına görə, Bakı Ağır Cinayətlər Məhkəməsində hakim Fikrət Qəribovun sədrliyi ilə keçirilən prosesdə prokuror çıxış edib.

Dövlət ittihamçısı çıxışında Sergey Vorobyovun 18 il müddətinə azadlıqdan məhrum edilməsini istəyib.

Vəkil çıxış edərək ədalətli qərar çıxarılmasını istəyib.

Təqsirləndirilən şəxs son sözündə sevdiyi qadını öldürmədiyini və özünü günahkar saymadığını deyib.

Hakimlər kollegiyasının hökmünə əsasən Serger Varobyov 17 il müddətinə azadlıqdan məhrum edilib.

Qeyd edək ki, iyunun 3-də Xətai rayonu ərazisində yaşayan Sergey Vorobyovun evində bıçaqla qətlə yetirilmiş 30-35 yaşlı qadın meyiti tapılıb.

Araşdırmalar zamanı mayın 31-də həmin qadının S.Vorobyova bıçaqla yüngül xəsarət yetirməsi, S.Vorobyovun isə bıçaqla onu qətlə yetirməsi müəyyən edilib.

Xətai Rayon Polis İdarəsinin (RPİ) 37-ci Polis Bölməsinin (PB) əməkdaşlarının keçirdikləri əməliyyat-axtarış tədbirləri nəticəsində S.Vorobyov tutulub.

Araşdırmalar zamanı həmin qadının adının Arzu olduğu bildirilsə də, onun şəxsiyyətini tam müəyyənləşdirmək mümkün olmayıb.

Bildirilib ki, S.Vorobyov həmin qadınla mayın əvvəlində şəhərin mərkəzindəki barlardan birində tanış olublar. Həmin vaxtdan sonra onlar S.Vorobyovla NZS-dəki evində yaşamağa başlayıblar. S.Vorobyov deyib ki, qadın özünü ona Arzu adı ilə təqdim edib və Türkmənistandan doğulduğunu, atasının Sumqayıtda yaşadığını, 15 il əvvəl ailə qurduğunu, uğursuz olan bu izdivacdan 12-13 yaşlı oğlunun olduğunu deyib. Subay olan və tək yaşayan S.Vorobyov öldürdüyü qadınla bağlı başqa informasiyaya malik olmadığını vurğulayıb.

Hadisənin necə baş verdiyinə gəlincə, tək və sərbəst həyat tərzi sürən S.Vorobyovla bir aya yaxın eyni evdə yaşayan həmin qadın onun sonrakı rəftarlarından narazı qalıb və cütlük arasında qısqanclıq münaqişələri yaranıb. Mayın 31-də onlar arasında dava-dalaş olub və həmin qadın S.Vorobyova bıçaqla hücum edib. Sevgilisinin əlindən bıçağı alan 42 yaşlı S.Vorobyov bir bıçaq zərbəsi ilə onu öldürüb. Qadının meyiti isə evdən iyunun 3-də tapılıb. S.Vorabyov ilkin ifadəsində qadının yıxılaraq xəsarət alması və boynunun sınması nəticəsində öldüyünü desə də, sonradan onun yalan danışdığı üzə çıxıb.

Onu da qeyd edək ki, ölən şəxsin əsil adı İlahə Şahbazovadır, lakin hamı onu Arzu adı ilə tanıyıb.