İri itlər kiçik itlərdən daha sürətlə qocalır - ARAŞDIRMA

İri itlərin kiçik cinslərlə müqayisədə daha qısa ömür sürməsinin səbəblərindən biri molekulyar qocalma prosesinin daha sürətlə getməsi ola bilər.

“Reuters” xəbər verir ki, alimlər müxtəlif cinslərdən olan 894 itə aid 1640 qan nümunəsini araşdıraraq bu qənaətə gəliblər.

Tədqiqat zamanı DNT metilasiyası — genlərin fəaliyyətini tənzimləyən kimyəvi dəyişikliklər öyrənilib. Nəticələr göstərib ki, iri və erkək itlərdə molekulyar qocalma əlamətləri daha sürətlə inkişaf edir. Bioloji yaşı gözləniləndən yüksək olan itlərdə vaxtından əvvəl ölüm riski də daha çox olub.

Alimlər müəyyən ediblər ki, iri itlərdə DNT-nin “hərəkət edən elementlər” adlanan hissələrini fəaliyyətsiz saxlayan mexanizmlər yaş artdıqca daha tez zəifləyir. Transpozonlar adlanan bu elementlərin aktivləşməsi genomun qeyri-sabitliyi və xərçəng kimi xəstəliklərlə əlaqələndirilir.

Tədqiqatçılar hesab edirlər ki, bu dəyişikliklər iri itlərin niyə daha tez qocaldığını izah etməyə kömək edə bilər. Onların fikrincə, molekulyar qocalma prosesinin müəyyən hissələrini ləngitmək gələcəkdə itlərin sağlam ömrünü uzatmaq üçün yeni imkanlar yarada bilər.

Alimlər həmçinin iri itlərin sürətlə böyüməsi və böyük bədən ölçülərinə görə yetişdirilməsinin onların ömrünə təsir göstərə biləcəyini düşünürlər. Bununla belə, qocalma mexanizmləri ilə ömür uzunluğu arasındakı əlaqəni dəqiqləşdirmək üçün əlavə araşdırmalara ehtiyac var.