Bir çox pişik sahibi bəzən heyvanın gözlərinin yaşardığını və ya uzun, sanki ağlamağa bənzər səslər çıxardığını görür. Bu isə tez-tez “pişik kədərləndiyi üçün ağlayır” kimi bir düşüncə yaradır.
Lent.az xarici mediaya istinadən xəbər verir ki, əslində pişiklərin davranışı insanlardan fərqlidir. Onlar narahatlıq, ehtiyac və ya stressi səs və mimika vasitəsilə bildirirlər, emosional göz yaşları ilə yox.
İnsanlarda göz yaşları güclü emosiyalar kədər, sevinc və ya qorxu zamanı yaranır.
Pişiklərdə isə göz yaşları hissləri ifadə etmək üsulu deyil. Bununla belə, pişik bəzən insanlara ağlamağa bənzəyən səslər çıxara bilər. Bu, adətən aşağıdakı hallarda olur:
ağrı zamanı
qorxu zamanı
tək qalanda
diqqət cəlb etmək istəyəndə
Heyvan “şikayət edirmiş kimi” səslər çıxarsa da, bu emosional göz yaşı ilə müşayiət olunmur.
Pişik səsləri nə deməkdir?
Sahiblərin “pişik ağlayır” kimi qəbul etdiyi səslər əslində fərqli vokalizasiyalardır. Bu səslər pişiyin yaşından, cinsindən, xarakterindən və vəziyyətdən asılı olaraq dəyişə bilər.
Ən çox rast gəlinən səslər:
ulama
yüksək səslə miyoldama
sakit, sanki sızlama kimi səslər
Bəzən pişiklər həyəcanlı və ya narazı olanda qısa “cıvıltı” kimi səslər də çıxara bilər. Güclü stress zamanı isə səslər uzun, kəskin və davamlı olur. Bu isə emosional ağlama yox, narahatlıq siqnalıdır.
Pişiyin “ağlamasının” əsas səbəbləri
Yüksək miyoldama və ulama adətən praktiki səbəblərlə bağlı olur:
Aclıq. Pişiklər yemək vaxtını tez yadda saxlayır. Qab boş olanda və ya yemək gecikəndə yüksək səslə miyoldaya bilər.
Harasa daxil olmaq və ya çıxmaq istəyi. Qapı bağlı olduqda pişik miyoldayaraq istədiyi otağa keçmək istəyir.
Diqqət ehtiyacı. Bəzən pişik sahibini çağırır oynamaq, sığallanmaq və ya sadəcə yanında insan olmasını istəyir.
Narazılıq. Pişiyi məcburi qucağa almaq və ya daşıma qəfəsinə qoymaq istəyəndə o, protest kimi miyoldaya və ya ulaya bilər.
Qorxu. Yeni insan, yüksək səs və ya başqa heyvan pişidə qorxu yarada bilər.
Sağlamlıq problemi. Davranışın kəskin dəyişməsi, tez-tez miyoldama, yemək və ya tualet vərdişlərində dəyişiklik ağrı və ya xəstəliyin əlaməti ola bilər. Bu halda baytara müraciət etmək lazımdır.
Pişiklərdə göz yaşarması nə deməkdir?
Əgər pişiyin gözləri yaşarırsa, bu adətən emosional ağlama deyil, fizioloji və ya tibbi səbəb olur. Bu vəziyyət epifora adlanır — göz yaşının həddindən artıq ifrazı.
Göz yaşlarının əsas funksiyası:
gözü nəmləndirmək
tozu yumaq
göz səthini qorumaq
Lakin aşağıdakı əlamətlər görünərsə, problem ola bilər:
tüklərdə yaş izləri
gözlərdə ifrazat və qızartı
pişiyin gözünü qıyaraq baxması və ya pəncəsi ilə ovuşdurması
Ən çox rast gəlinən səbəblər:
virus və bakterial göz infeksiyaları
allergik konyunktivit
buynuz qişanın zədələnməsi və ya mikrotravmalar
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
