Ançelotti Braziliya millisindəki yaxın planlarından DANIŞDI

İyunun 11-də italiyalı mütəxəssis və Braziliya millisinin baş məşqçisi Karlo Ançelotti yeni işində ilk qələbəsini qazanıb. Onun komandası Paraqvaya 1:0 hesabı ilə qalib gəlib.

Lent.az-ın xəbərinəgörə, Braziliya seçmə turnirdə Paraqvayı məğlub edərək, qarşıdakı dünya çempionatına vəsiqəni təmin edib.

Ançelottinin özü üçün bu, onun beşqat dünya çempionlarının sükanı arxasında ikinci oyunu olub.

"Komanda iki oyunda bir qol buraxmadı, çünki müdafiədə yaxşı oynadılar, məsələn, Kazemiro kimi yarımmüdafiəçilər, böyük səy göstərdilər. Üstəlik, mundiala çıxdıq. Hamı yaxşı işləyirdi, soyunub-geyinmə otağında heç bir problemimiz yox idi. Hər şey çox yaxşı keçdi, xüsusi olaraq kimisə fərqləndirmək istəmirəm. Dörd hücumçu ilə oynadıq, komanda balanslı idi", - Karlo Ançelotti deyib.

İndi Braziliyanın bu seçmə mərhələdə daha iki oyunu olsa da, onlar sentyabrda baş tutacaq.

O vaxta qədər yeni məşqçinin daha çox görəcəyi iş var.

"Əvvəla, yaşamaq üçün yer tapmalıyam, sonra Klublararası Dünya Çempionatına gedəcəm. Hazırda bütün dünyada, Avropada və ərəb ölkələrində çıxış edən böyük bir oyunçu siyahısım var. Onların sayı 70-ə yaxındır, onların hər birini dəyərləndirməyə vaxtımız olacaq. 2026-cı il dünya çempionatına mütləq gedəcək 25-26 futbolçunun konkret siyahısı yoxdur", - Ançelotti vurğulayıb.

Komandasının ayrı-ayrı ulduzlarının fərdi xüsusiyyətlərinə gəlincə, Ançelotti bir sıra liderləri qeyd edib.

"Vinisuisi bəyəndim, o, çox yaxşı oynadı. Neymarla oteldə tanış oldum, formaya düşsə, o, meydançanın istənilən yerində oynaya bilər. On meydan oyunçusunun hamısının qaçması və özünü qurban verməsi vacibdir. Rodriqo bunu dəfələrlə edib, biz onu çox yaxşı tanıyırıq. Rafinya müstəsna fiziki performansla möhtəşəm keyfiyyətləri birləşdirən parlaq oyunçudur", - Karlo Ançelotti deyib.

Karlo Ançelotti Braziliya komandasının sükanı arxasında debüt oyununa iyunun 6-da, komandasının Ekvadorla səfərdə 0:0 hesablı heç-heçə etdiyi zaman çıxıb.