"Barselona" ulduzunun qiymətini müəyyənləşdirdi: PSJ hücumçu üçün təklif hazırlayır

Kataloniya klubu Ferran Torres üçün ən azı 50 milyon avro istəyir

"Barselona" bu yay İspaniya millisinin hücumçusu Ferran Torresi satmağı düşünməyə hazırdır, lakin Kataloniya klubu onun transfer haqqı ilə bağlı güzəştə getmək istəmir.

Lent.az-ın xarici mediaya istinadən xəbərinə görə, 25 yaşlı cinah oyunçusu üçün əsas namizəd PSJ-dir. Parislilər artıq oyunçu ilə şəxsi şərtlər barədə razılığa gəliblər və tezliklə rəsmi təklif verə bilərlər.

Lakin tərəflər hələ də transfer haqqı barədə razılığa gəlməkdən uzaqdırlar. "Barselona" Torresi ən azı 50 milyon avro dəyərində qiymətləndirir, PSJ isə yalnız 40 milyon avro ödəməyə hazırdır.

Fransa klubu iddia edir ki, ispaniyalı futbolçunun "Barselona" ilə müqaviləsi yalnız gələn yaya qədərdir. Kataloniyalılar oyunçunu indi satmasalar, o, bir ildən sonra klubu azad agent kimi pulsuz tərk edə biləcək.

Klublar arasında danışıqların tezliklə intensivləşəcəyi gözlənilir. Mənbənin məlumatına görə, PSJ-dən rəsmi təklif 2026-cı il Dünya çempionatından sonra gələ bilər.