Ağstafa-Poylu mənzilində əsaslı təmir başladı – FOTO

«Azərbaycan Respublikasında dəmir yolu nəqliyyat sisteminin 2010-2014-cü illərdə inkişafına dair Dövlət Proqramı”nın icrası çərçivəsində Bakı-Böyük Kəsik istiqamətində 317 km yolun əsaslı təmiri davam edir.

“Azərbaycan Dəmir Yolları” Qapalı Səhmdar Cəmiyyəti Mətbuat Katibliyinin rəisi Nadir Əzməmmədovun Lent.az-a verdiyi məlumata görə, Dövlət Proqramı çərçivəsində Bakı-Böyük Kəsik istiqamətində 317 km yolun əsaslı təmirinə 10 iyun 2011-ci ildə Tatlı-Ağstafa sahəsinin 97-ci kilometrində start verilib.

Bu günə kimi 113 km yol əsaslı təmir olunub. 11-13 sentyabr tarixlərində növbəti yol qoyuluşu həyata keçiriləcək və 3737 metr yol əsaslı təmir olunacaq. İki gün ərzində Ağstafa-Poylu mənzilinin 74-75-ci km-də 1862 metr, Soyuq-Bulaq-Böyük Kəsik mənzilinin 48-47-ci km-də 1875 metr yolun təmir edilməsi nəzərdə tutulur. Əsaslı təmir işlərini “Azərbaycan Dəmir Yolları” QSC “Dəmiryolservis” MMC-nin müəssisələri və İnfrastruktur Departamentinin müvafiq qurumları həyata keçirir. “Dəmiryolservis” MMC-nin baş direktoru Əli Əşrəf Lütfəlibəyov bildirib ki, Ağstafa-Poylu mənzilində səhər saatlarında söküntü işlərinə başlanılıb.