Liftə daxil olur, qapıya tərəf dayanır və gözlərinizi ya telefona, ya da yerə zilləyirsiniz. Əksəriyyət məhz belə davranır. Amma psixoloqlar hesab edirlər ki, bu, ilk səhvdir. Dar məkanın psixologiyası öz qaydalarını diktə edir və bu qaydaların pozulması həm sizin, həm də ətrafınızdakı insanlar üçün lift səfərini stressə çevirə bilər. Lift sadəcə hərəkət edən kabinə deyil, insanların sosial davranışlarını əks etdirən kiçik bir modeldir.
Lent.az bu 5 səhvi təqdim edir:
Birinci səhv: qapının qarşısında dayanmaq
Liftə ilk daxil olan şəxslər mümkün qədər içəri tərəfə keçməli, sonradan daxil olanlar isə qapıya yaxın dayanmalıdır. Əks halda, daha yuxarı mərtəbələrə qalxan insanların çıxışına maneə yaranır.
İkinci səhv: telefon ekranına və ya divara baxmaq
Psixoloqlar bildirirlər ki, nümayişkaranə şəkildə ünsiyyətdən qaçmaq narahatlıq hissini artırır. Qısa göz təması və yüngül baş hərəkəti insanlarda gərginliyi azaltmağa kömək edə bilər.
Üçüncü səhv: qəfil hərəkətlər
Dar məkanda edilən istənilən ani hərəkət çantanı düzəltmək, paketi bir əldən digərinə keçirmək və ya qəfil dönmək ətrafdakılar tərəfindən təhlükə kimi qəbul oluna bilər. Buna görə də liftdə bütün hərəkətləri sakit və asta şəkildə etmək tövsiyə olunur.
Dördüncü səhv: şəxsi sərhədləri pozmaq
Liftdə insanlar arasında ideal 60 santimetrlik məsafəni qorumaq həmişə mümkün olmasa da, başqasının şəxsi məkanına həddindən artıq yaxınlaşmaqdan çəkinmək lazımdır. Bunun üçün üzünüzü qismən küncə tərəf çevirmək və ya diaqonal istiqamətdə dayanmaq daha uyğun hesab edilir.
Beşinci səhv: telefonla yüksək səslə danışmaq
Liftin qapalı məkanı səsləri daha da gücləndirir. Bu səbəbdən telefonla yüksək səslə danışmaq ətrafdakılar üçün narahatlıq yarada bilər.
Bunun əvəzinə nə etmək lazımdır?
Liftə daxil olduqda qısa şəkildə "salam" demək və ya baş hərəkəti ilə salamlaşmaq kifayətdir. Qapıya tərəf dayanmaq, lakin bədəninizi bir qədər diaqonal vəziyyətdə saxlamaq tövsiyə olunur. Baxışlarınızı mərtəbə göstəricisinə yönəltmək neytral davranış hesab edilir. Əgər liftdə uşaqla birlikdəsinizsə, onun geyimini düzəltmək və ya uzun müddət onunla məşğul olmaq da digər insanların şəxsi məkanını pozmaq kimi qəbul edilə bilər.
Lift insan davranışının göstəricisi kimi
Psixoloqlar hesab edirlər ki, insanın liftdəki davranışı onun sosial bacarıqları və narahatlıq səviyyəsi barədə müəyyən təsəvvür yarada bilər. Sakit və özünəinamlı insanlar adətən qapıya tərəf dayanır, əllərini sərbəst saxlayırlar. Daha narahat xarakterli insanlar küncə çəkilməyə üstünlük verirlər. Aqressiv davranışa meyilli şəxslər isə qapının qarşısını kəsərək başqalarının hərəkətinə mane ola bilərlər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
