Zeytun yağı alarkən edilən ən böyük səhv

Zeytun yağı sağlam yağlar arasında ən faydalı məhsullardan biri hesab olunur. Lakin mütəxəssislər xəbərdarlıq edirlər ki, insanların çoxu faydalı xüsusiyyətlərini itirmiş rafinə edilmiş zeytun yağı alır.

Lent.az xəbər verir ki, yemək hazırlayarkən düzgün yağ seçimi sağlamlıq üçün böyük əhəmiyyət daşıyır. Zeytun yağı məşhur Aralıq dənizi pəhrizinin əsas tərkib hissəsi olsa da, mağaza rəflərində olan hər məhsul eyni dərəcədə faydalı deyil. Orqanizm üçün ən dəyərli seçim yalnız "extra virgin" (birinci soyuq sıxım) etiketi olan zeytun yağıdır. Eyni adlı adi zeytun yağı isə kimyəvi emal prosesindən keçdiyi üçün faydalı maddələrinin əksəriyyətini itirir.

Vitaminlər hara yox olur?

"Extra virgin" zeytun yağı yalnız soyuq sıxma üsulu ilə əldə edilir. Bu zaman məhsul yüksək temperatura və ya rafinasiya prosesinə məruz qalmır. Nəticədə onun tərkibində güclü antioksidant hesab olunan polifenollar qorunub saxlanılır. Bu maddələr sərbəst radikallarla mübarizə apararaq qocalma prosesini ləngidə bilər. Bundan əlavə, emal olunmamış zeytun yağı A, D, E və K vitaminləri, eləcə də kalium, maqnezium və fosfor kimi vacib minerallarla zəngindir. Adi rafinə edilmiş zeytun yağı isə kimyəvi emaldan keçir. Bu, məhsulun daha uzun müddət saxlanmasına və yüksək temperaturda daha sabit olmasına kömək etsə də, vitamin və antioksidantların böyük hissəsini məhv edir.

Dad fərqi də var

İstehsal üsulu zeytun yağının dadına da təsir göstərir. Keyfiyyətli "extra virgin" zeytun yağı zəngin təbii ətrə, yüngül meyvə notlarına, azacıq acılığa və istiotabənzər dad çalarına malik olur. Rafinə edilmiş zeytun yağı isə demək olar ki, neytral dada sahibdir. Bu xüsusiyyət bəzi yeməklərin orijinal dadını dəyişməmək baxımından üstünlük sayılsa da, qida dəyəri baxımından daha kasıb hesab olunur.

Hansı yağdan necə istifadə etmək lazımdır?

Mütəxəssislər bildirirlər ki:

"Extra virgin" zeytun yağından salatların hazırlanmasında, sous və diplərin tərkibində, yəni əsasən soyuq yeməklərdə istifadə etmək daha məqsədəuyğundur. Qızartma üçün isə istiliyə daha davamlı olduğu üçün adi zeytun yağı uyğun seçim sayıla bilər. Supermarketlərdə bəzən müxtəlif bitki yağlarının qarışıqları zeytun yağı adı altında satılır. Buna görə də məhsul alarkən etiketdəki məlumatlara diqqət yetirmək vacibdir.

Turşuluq səviyyəsi

Bu göstərici məhsulun keyfiyyətini müəyyən edən əsas amillərdən biridir. "Extra virgin" zeytun yağında turşuluq səviyyəsi 0,8 faizdən yüksək olmamalıdır. İdeal göstərici isə təxminən 0,3 faiz hesab edilir. Müqayisə üçün qeyd edək ki, adi rafinə edilmiş zeytun yağlarında bu rəqəm 3 faizə qədər yüksələ bilər.

Yararlılıq müddəti

Emal olunmamış zeytun yağı daha az işlənmiş məhsul olduğu üçün daha tez xarab olur. Buna görə də alış zamanı istehsal və son istifadə tarixlərinə diqqət yetirmək, mümkün qədər təzə məhsul seçmək tövsiyə edilir.