Badımcan mövsümündə qış üçün bir neçə banka dadlı qəlyanaltı hazırlamaq mümkündür. Bu reseptdə badımcan şirin və acı bibər, pomidor, sarımsaq, soya sousu və sirkə ilə birlikdə bişirilir.
Lent.az qış üçün badımcan qəlyanaltısının hazırlanma qaydasını təqdim edir.
Lazım olan ərzaqlar
3 kq badımcan, 1,3 kq şirin bibər, 200 qram acı bibər, 1 kq pomidor, 300 ml bitki yağı, 5 xörək qaşığı şəkər tozu, 2 xörək qaşığı duz, 100 ml soya sousu, 1 baş sarımsaq və 50 ml 9 faizli sirkə lazımdır.
Acı bibərin miqdarını zövqə uyğun azaltmaq və ya artırmaq olar.
Hazırlanma qaydası
Əvvəlcə badımcanları doğrayın, üzərinə 2 xörək qaşığı duz səpin və bir müddət saxlayın. Bu, badımcanların suyunu buraxmasına və mümkün acılığın azalmasına kömək edir. Daha sonra badımcanları axar su altında yaxşıca yuyun.
Pomidorları doğrayaraq böyük qazana tökün. Üzərinə bitki yağı əlavə edib təxminən 5-7 dəqiqə bişirin.
Daha sonra qazana doğranmış şirin və acı bibəri, həmçinin hazırlanmış badımcanları əlavə edin. Qarışığı təxminən 20 dəqiqə vam odda bişirin.
Ardınca şəkər tozu, duz və soya sousunu əlavə edin. Xırda doğranmış və ya əzilmiş sarımsağı da qarışığa qatıb daha 10 dəqiqə bişirin. Bu mərhələdə qəlyanaltının dadına baxaraq duzun, şəkərin və acı bibərin miqdarını zövqünüzə uyğun tənzimləmək olar.
Sonda 50 ml 9 faizli sirkə əlavə edin, qarışdırın və daha 5 dəqiqə bişirin.
Hazır, isti qəlyanaltını əvvəlcədən sterilizasiya edilmiş təmiz bankalara doldurun və qapaqlarını kip bağlayın. Əlavə təhlükəsizlik üçün dolu bankaları su qaynadıqdan sonra təxminən 5 dəqiqə yenidən sterilizasiya etmək də mümkündür.
Badımcan seçərkən nəyə diqqət etməli?
Qəlyanaltının dadı istifadə olunan badımcanların keyfiyyətindən də asılıdır. Təzə badımcanın qabığı parlaq və elastik, saplağı isə yaşıl olmalıdır.
Üzərində qəhvəyi ləkələr və ya yumşalmış, batıq hissələr olan badımcanları almaq məsləhət görülmür. Bu əlamətlər tərəvəzin zədələndiyini və ya uzun müddət saxlanıldığını göstərə bilər.
Kiçik badımcanlar adətən daha az acı olur və salat, sobada bişirmə kimi yeməklər üçün daha əlverişli hesab edilir.
Badımcanın yağ çəkən tərəvəz olduğunu da nəzərə almaq lazımdır. Daha az yağlı yemək hazırlamaq istəyənlər badımcanı bol yağda qızartmaq əvəzinə sobada bişirə, qrildə hazırlaya və ya az miqdarda yağla yüngülcə qızarda bilərlər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
