Beynəlxalq Müşahidə Qrupu rəyini açıqladı

“Səsvermənin nəticələri Azərbaycan xalqının iradəsini əks etdirib”

Altı Avropa ölkəsinin 20 parlamentarisindən ibarət Beynəlxalq Müşahidə Qrupu Azərbaycanda Konstitusiya dəyişikliklərinə dair dünən keçirilən referendumla bağlı apardıqları müşahidələrin nəticələrini açıqlayıb.

Lent.az-ın məlumatına görə, belçikalı senator, ATƏT Parlament Assambleyasının üzvü Alayn Deştixe mətbuat konfransında referendumu izləmək üçün Azərbaycan parlamenti tərəfindən dəvət olunduqlarını deyib. Referendumdan bir neçə gün əvvəl Bakıya gəldiklərini xatırladan avropalı qonaq referendumqabağı kampaniya barədə rəy bildirmək imkanlarının olmadığını söyləyib.

“Biz etiraf edirik ki, səsvermə prosesi zamanı gecikdirmə və mümkün problemlərin qarşısının alınması üçün kifayət qədər seçki qutuları mövcud idi. Ona görə də biz belə bir nəticəyə gəlirik ki, səsvermənin nəticələri Azərbaycan xalqının iradəsini əks etdirib. Biz həm də Azərbaycan hökumətini demokratik təsisatların, xüsusilə də ATƏT və Avropa Şurasının qarşısında götürdüyü öhdəlikləri yerinə yetirməyə səsləyirik. ATƏT-i isə gələcək seçkilərə və ya referendumlara rəsmi müşahidəçi göndərməyə çağırırıq. Biz qəbul edirik ki, bu referendum Azərbaycanın mürəkkəb regional mühitdə mərkəzləşmiş stabil və dinc ölkə kimi mövqeyini möhkəmləndirir”- deyə, belçikalı senator bildirib.

Beynəlxalq müşahidəçilər sonda MSK-ya və Azərbaycan parlamentinin heyətinə onlara etdiyi yardıma görə təşəkkürlərini bildiriblər.