5 rayonda meşə fondu torpaqları korlanıb

Ekologiya və Təbii Sərvətlər Nazirliyinin Ətraf Mühit üzrə Milli Monitorinq və Ətraf Mühitin Mühafizəsi Departamentlərinin əməkdaşları tərəfindən Respublika ərazisində torpaq ehtiyatlarının qorunub mühafizə olunması məqsədilə növbəti monitorinq-araşdırma aparılıb.

Ekologiya və Təbii Sərvətlər Nazirliyinin mətbuat xidmətindən Lent.az-a verilən məlumata görə, monitorinq-araşdırma zamanı Kür çayının sahilboyu ərazilərində Sabirabad, Saatlı, Kürdəmir, İmişli, Salyan rayonlarında meşə fondu torpaqlarının korlanması faktları aşkar olunub.

Müəyyən olunub ki, torpağın üst münbit qatı məhv edilib, ətraf mühitə 7 milyon 832 min 440 manat məbləğində ziyan dəyib. Təbiətə dəymiş ziyanın ödənilməsinin təmin edilməsi məqsədilə müvafiq tədbirlər görülür.

Monitorinq-araşdırmalar davam etdirilir.