3 yaşlı bəxtəvər 2,5 milyon funt tapdı

Lent.az-ın “BBC”yə istinadən verdiyi məlumata görə, 3 yaşlı uşaq atası və babası ilə Xokley rayonunda gəzintiyə çıxıb.

O, atasından metal axtaran aparatı istəyib və aparatla oynayan zaman 2 qızıl əşya tapıb.

Uşağın atası, 34 yaşlı Ceyson Xiat deyib ki, 15 ildir ki, metal axtaran aparatla müxtəlif yerlərə gedir, ancaq heç nə tapmır. Ata hesab edir ki, övladı dünyanın ən bəxtəvər insanlarından biri olacaq.

Uşağın tapdığı zinət əşyalarını araşdıran ekspertlər hesab edirlər ki, bu, 16-cı əsrdə VIII Henrinin dövründə yaşamış bir aristokrat ailəyə məxsusdur. İlkin qiymətləndirməyə görə, zinət əşyalarının dəyəri 2,5 milyon funtdur.