Avropa Birliyi “Atatürkü qorumayın” dedi

Türkiyədən daha bir tələb
Avropa Birliyi Komissiyasının Türkiyə ilə bağlı sabah açıqlayacağı hesabatında bu ölkədə mövcud qanunvericiliyin söz azadlığını məhdudlaşdırdığı qeyd olunur.

Lent.az-ın “ensonhaber.com” saytına istinadən verdiyi məlumata görə, bu hesabatda Türkiyədə türkçülüyü təhqirlə bağlı 301-ci maddənin, o cümlədən Cəza Qanununda namus suçları (125-131-ci maddələr), ictimai asayişi pozma (214, 216, 217, 218, 220-ci maddələr) və dövlət təhlükəsizliyinə zərbə vurma (312, 314-cü maddələr) ilə bağlı cəzaları nəzərdə tutan maddələrin ləğv edilməsi tələb olunur.

Komissiyanın hesabatında daha çox diqqət çəkən məqamlar isə Cəza Qanunundan hərbi qulluqdan yayınmağa təşviq etmə ilə bağlı cəzanı nəzərdə tutan 318-ci maddənin və Atatürkü qorumaqla bağlı qanunun ləğvinin istənilməsidir.

Hesabatda kürd və erməni məsələsinə toxunulur, 200 türkün ermənilərdən üzr istənilməsi ilə bağlı başladıqları kampaniyaya xüsusi yer ayrılır.