Azərbaycan İrana humanitar yardım göndərdi

Azərbaycan prezidenti İlham Əliyevin tapşırığı ilə Fövqəladə Hallar Nazirliyi (FHN) İranın zəlzələdən zərər çəkmiş bölgəsinə yardım yola salıb.

APA-nın xəbərinə görə, 25 yük maşınından ibarət yardım karvanı FHN-nin Mülki Müdafiə Qoşunlarının Bakıdakı bazasından İrana yola düşüb.

Mülkü Müdafiə Qoşunları Komandanının müavini, polkovnik Aslan Hüseynov deyib ki, yardım karvanında müxtəlif ərzaq məhsulları (içməli su, meyvə şirələri, bitki yağları, düyü, makaron, zeytun və digər zəruri ərzaq məhsulları), həmçinin 40 ton un, 460 çadır və 1000 ədəd yataq dəsti yola salınıb.

A. Hüseynovun sözlərinə görə, yardım karvanının sabah səhər saatlarında İranın zəlzələdən ən çox zərər çəkmiş bölgələrindən olan Əhərə çatdırılması planlaşdırılır.

***
Azərbaycan İranın zəlzələdən zərər çəkmiş bölgəsinə humanitar yardım göndərir.

APA-nın xəbərinə görə, yardımı Azərbaycan Fövqəladə Hallar Nazirliyi yola salır.

Məlumata görə, yardım bu gecə zəlzələ bölgəsinə yola salınacaq.

Qeyd edək ki, dünən İranın Şərqi Azərbaycan əyalətində güclü zəlzələ baş verib. Rəsmi məlumatlarda zəlzələ nəticəsində 300 nəfərin öldüyü, 5 min nəfərin yaralandığı, yüzlərlə kəndin dağıldığı bildirilib.