Ailəsinə cəza vermək üçün "özünə" 50 BIÇAQ VURDU - FOTO

Almaniyanın İnqolştadt şəhərində qız ailəsinə cəza vermək üçün özünün oxşarını öldürüb.

Lent.az xarici KİV-ə istinadən xəbər verir ki, 2022-ci ilin avqustunda İran əsilli 23 yaşlı gözəllik ustası Şaraban K. valideynləri ilə mübahisə zəminində gizlənmək qərarına gəlib.

O, ailəsinə cəza vermək üçün öz ölümünü saxtalaşdırmağı planlaşdırıb. Şəraban K. sosial şəbəkələrdə özünə oxşayan bir neçə qadın taparaq onlarla görüş təşkil edib.

Yalnız Əlcəzairdən olan 23 yaşlı blogger Xədicə O. kosmetika almaq bəhanəsi ilə görüşə razılıq verib. Şaraban K. rəfiqəsi, 23 yaşlı Kosovo əsilli Şekir K. ilə birlikdə onu maşınla olduğu ünvandan götürməyə gəlib. Şaraban K. rəfiqəsi ilə Xədicəni meşəyə apararaq zorla maşından düşürüb. Elə oradaca ona təxminən 50 bıçaq zərbəsi vurublar.

Bundan sonra öldürülən qadının cəsədini maşının arxa oturacağına qoyub İnqolştadta aparıblar. Onlar avtomobili meyitlə birlikdə Dunay çayının sahilinə yaxın, sakit yaşayış massivində saxlayıblar. Avqustun 16-da gecə yarısı meyiti Şarabannın valideynləri tapıblar. Valideynlər qətlə yetirilən qadının onların qızı olduğunu müəyyən ediblər. Onların uzun qara düz saçları, oxşar quruluşları və makiyajları bir-birinə çox oxşayırdı.

Mütəxəssislər meyiti yardıqdan sonra qadının əsl şəxsiyyətini müəyyən ediblər. Polis araşdırma zamanı Şaraban K. və Şekir K.ni tapmağa müvəffəq olub, şübhəlilər saxlanılıb. Əgər günahı sübuta yetirilərsə, qadınları ömürlük həbs cəzası gözləyir.