MTN-nin idarə rəisinin məhkəməsi davam edib - YENİLƏNİB

Zərərçəkmiş Hüseyn Səfərov ifadəsində qeyd edib ki, bu hadisələrdən sonra pis vəziyyətə düşüb, üç övladının evləri banklar tərəfindən müsadirə edilib: "Evimi də satmışam, yaşamağa yerim yoxdu. Bu işlərlə bağlı Mövlan Şıxəliyevdən (MTN-nin baş istintaq idarəsinin sabiq rəisi) prokurorluğa şikayət etmişəm. Məni prokurorluqda dindiriblər, amma heç bir tədbir görülməyib. Mülki iddiam təmin olunsun, Vüsal Ələkbərova istəyirsiniz, bəraət verin. Onun cəzası ilə bağlı şikayətim yoxdur. Allah qapısını açsın".

Zərərçəkən qeyd edib ki, onun pulunu Mövlan Şıxəliyev alıb: "Həmin vaxt mən həbsdə idim. 18 yaşı tamam olmayan oğluma pulu gətizdirmişdilər. Vüsal Ələkbərov pulu oğlumdan götürərək Mövlan Şıxəliyevin otağına aparıb".

Daha sonra zərərçəkənlərdən Müsənnif Salahov dindirilib. O qeyd edib ki, “Texnikabank” ASC-nin Sumqayıt filialının müdiri işləyəndə MTN-ə çağırılıb və 600 min manatını alınıb. O həmçinin verdiyi mülki iddianın təmin olunmasını istəyib.

Zərərçəkmiş həmçinin apellyasiya şikayətinə məhkəmə istintaqı ilə baxılmasını istəyib.

Hakim vəsatəti təmin etməyib.

Hər iki zərərçəkmiş Vüsal Ələkbərovun apellyasiya şikayəti ilə bağlı hissədə qərar qəbul edilməsini məhkəmənin mülahizəsinə buraxdıqlarını deyiblər.

Proses noyabrın 30-da davam edəcək.

15:53

Ləğv edilmiş Milli Təhlükəsizlik Nazirliyi İstintaq Baş İdarəsi 2-ci istintaq şöbəsinin sabiq rəisi Vüsal Ələkbərov barəsində birinci instansiya məhkəməsinin hökmündən zərərçəkmişlər və mülki iddiaçılar apelyasiya şikayəti üzrə məhkəmə davam edib.

Lent.az-ın məlumatına görə, Bakı Apellyasiya Məhkəməsində hakim Qədim Babayevin sədrliyi ilə keçirilən prosesdə zərərçəkmişlərdən Akif Qurbanov apellyasiya şikayətindən imtina edib.

Digər zərərçəkmiş Hüseyn Səfərov apellyasiya şikayətinin təmin olunmasını və 2 milyon manatın Vüsal Ələkbərovdan alınaraq özünə qaytarılmasını tələb edib.

Proses hazırda davam edir.

Qeyd edək ki, Bakı Hərbi Məhkəməsində hakim Siyavuş Hacıyevin sədrliyi ilə baş tutan prosesdə Vüsal Ələkbərov 12 il müddətinə azadlıqdan məhrum edilib.

Məhkəmə həmçinin polkovnikin rütbəsinin əlindən alınması barədə xüsusi qərardad çıxarıb. Hökmə görə Vüsal Ələkbərovun əmlakı müsadirə edilərək zərərçəkmiş iş adamı Akif Qurbanova verilməsi barədə qərar qəbul edilib.

Məhkəmə həmçinin sabiq milli təhlükəsizlik naziri Eldar Mahmudov və həmin nazirliyin baş istintaq idarəsinin rəisi olmuş Mövlan Şıxəliyevin barəsində cinayət işinin başlanması ilə bağlı xüsusi qərardad çıxarıb və həmin qərarın surəti icra olunması üçün aidiyyəti üzrə prokurorluğa göndəriləcək.

Hökmdən narazı olan zərərçəkmiş və mülki iddiaçılar – Nizami Kazımov, Hüseyn Səfərov, Elşən Mədətov, Mehrac Qurbanov, Namil Rzayev, Bahəddin Sultanov, Müsənnif Salahov apelyasiya şikayətlərini Bakı Hərbi Məhkəməsinə təqdim ediblər.

Vüsal Ələkbərova qarşı Nizami Kazımov 2 milyon dollar, Hüseyn Səfərov 2 milyon dollar, Elşən Mədətov 250 min dollar, Mehrac Qurbanov 200 min dollar, Namil Rzayev 500 min dollar, Bahəddin Sultanov 370 min dollar, Müsənnif Salahov isə 600 min manat məbləğində mülki iddia qaldırıblar.

Bakı Hərbi Məhkəməsi hökm çıxaran zaman zərərçəkmişlərin mülki iddialarını təmin etməyib. Məhkəmə hökmündə bildirib ki, zərərçəkmişlər həmin məbləğlərdə pulu Vüsal Ələkbərova rüşvət qismində veriblər və buna görə də onların mülki iddiaları təmin olunmayıb.

Zərərçəkmişlər apelyasiya şikayətlərində hökmün bu hissəsinin ləğv edilməsini və onların mülki iddialarının təmin edilməsini istəyiblər.

Vüsal Ələkbərovun vəkilləri də hökmdən apellyasiya şikayəti veriblər. Vəkillər hökmün ləğv edilməsini və Vüsal Ələkbərovun barəsində bəraət hökmünün çıxarılmasını istəyiblər.