"Qarabağ" 1 milyon avroya futbolçu alır?
24 yanvar 2022 15:12 (UTC +04:00)

"Qarabağ" 1 milyon avroya futbolçu alır?

Transfer çalışmalarını davam etdirən “Qarabağ” üçün prioritet hücumçu transferidir.

Apasport.az saytının məlumatına görə, baş məşqçi Qurban Qurbanov eyni zamanda orta sahədə də rəqabəti artırmaq niyyətindədir.

Ağdamlılar qış fasiləsində olmasa da, mövsümün sonunda mütləq bir əcnəbi yarımmüdafiəçi almağı planlaşdırır. Riçard Almeydanın əvvəlki performansı göstərə bilməməsi və Patrik Andradenin bu mövqedə əvəzedilməz olması Konfrans Liqasının iştirakçısını axtarışa vadar edib.

Adı Qurbanovun siyahısında olan bu mövqe üzrə futbolçulardan biri də “Riyeka”nın üzvü Lindon Selahidir. “Anderlext”in yetirməsi həm oyun qurucusu, həm də pleymeyker mövqeyində çıxış etməyi bacarır. Doğrudur, klubun skautları Selahini diqqətdə saxlamaqda davam edir. Ancaq onu Azərbaycana gətirmək heç də asan olmayacaq. Çünki “Riyeka”ya ötən il “Tvente”dən keçən Albaniya millisinin üzvünün potensialı yüksək qiymətləndirilir. Bu səbəbdən 23 yaşlı oyunçunun özünü keçidə razı salmaqla yanaşı, Xorvatiya klubuna da yüksək təzminat məbləği ödənilməlidir. “Transfermarkt”da Lindonun qiyməti 1 milyon avro göstərilib.

Qeyd edək ki, Lindon Selahi peşəkar karyerasında “Riyeka”dan əvvəl “Standard”, “Villem II” və “Tvente”nin formasını geyinib. Onun xorvatiyalılarla müqavilə müddəti 2024-cü ilin yayına qədərdir.

# 1944
avatar

Oxşar yazılar