İqtisadi İnkişaf Nazirliyinin kollegiyası toplandı

Oktyabrın 21-də İqtisadi İnkişaf Nazirliyində kollegiyanın geniş iclası keçirilib.

Nazirliyin mətbuat xidmətindən Lent.az-a bildiriblər ki, kollegiyada Nazirlər Kabinetinin 2010-cu ilin 9 ayının sosial-iqtisadi inkişafının yekunlarına həsr olunmuş iclasında dövlət başçısının tapşırıqlarına uyğun olaraq, İqtisadi İnkişaf Nazirliyi tərəfindən görüləcək işlər müzakirə edilib. İclasda ölkədə biznes mühitinin daha da yaxşılaşdırılması və sahibkarlığın inkişafına dövlət dəstəyinin gücləndirilməsi istiqamətində həyata keçirilən tədbirlər və prioritet istiqamətlər, yeyinti məhsullarının Avropa İttifaqına ixracı ilə bağlı görülmüş işlər və qarşıda duran vəzifələr, vətəndaşların müraciətlərinə baxılması işinin və Elektron İdarəetmə Sisteminin tətbiqi vəziyyətindən danışılıb.

İclası yekunlaşdıran iqtisadi inkişaf naziri, kollegiyanın sədri Şahin Mustafayev qarşıya qoyulan vəzifələrin həyata keçirilməsi istiqamətində konkret tapşırıqlar verib. Toplantıda prezident İlham Əliyevin Nazirlər Kabinetinin sonuncu iclasındakı çıxışından irəli gələn vəzifələrin icrası ilə bağlı Tədbirlər Planının hazırlanması barədə qərar qəbul edilib.

Elxan SALAHOV